अहिल्यानगर : पुण्यश्लोक अहिल्यादेवी होळकर यांच्या त्रिशताब्दी जयंतीनिमित्त चोंडी येथे आज (दि. ६ मे) होत असलेल्या मंत्रिमंडळ बैठकीला दुपारी साडेबारा वाजता सुरुवात होणार आहे. मुख्यमंत्री देवेंद्र फडणवीस यांच्या अध्यक्षतेखाली ही मंत्रिमंडळ बैठक दीड तास चालणार असून यासाठी ‘जर्मन हँगर’ प्रकारचा मंडप उभारण्यात आला आहे.

मंत्री, विविध विभागांचे सचिव, आमदार यांच्यासाठी वातानुकूलित विविध कक्ष उभारले आहेत. साडेतीन हजार खुर्चाची व्यवस्था केली आहे. राज्य मंत्रिमंडळाची पहिलीच बैठक ग्रामीण भागात चौंडीमध्ये होत आहे.

या बैठकीच्या निमित्ताने अहिल्यानगर जिल्ह्यासाठी पुण्यश्लोक अहिल्यादेवी होळकर सृष्टी, संत ज्ञानेश्वर सृष्टी, भुईकोट किल्ला संवर्धन, पेडगाव किल्ला येथे छत्रपती संभाजी महाराज स्मारक, तसेच जिल्ह्याच्या औद्योगिक विकास आराखड्याला मोठा निधी मिळण्याची शक्यता आहे.

मुख्यमंत्री, उपमुख्यमंत्री, मंत्रिमंडळ, सचिव यांच्यासह सहाशे व्हीव्हीआयपींच्या भोजनाची व्यवस्था बचत गटातील महिलांकडे देण्यात आली आहे. यात जिल्ह्यातील प्रसिद्ध असलेले १५-२० विविध पदार्थ बनवले जाणार आहेत. त्यात शिपी आमटी, आमरस, शेंगोळे, थालीपीठ, वांग्याचे भरीत, डाळबट्टी, दही धपाटे आदी पदार्थांचा समावेश असून मंत्री, आमदार आणि सचिवासांठी चांगलीच मेजवानी ठरणार आहे.