Budget for Renewable Energy Sector : अर्थमंत्री निर्मला सीतारामन यांनी आज गुरुवारी केंद्र सरकारचा अंतरिम अर्थसंकल्प सादर केला. यामध्ये अक्षय उर्जेवर लक्ष केंद्रित केले आहे. त्यामुळे आज वीज आणि ऊर्जा शेअर्समध्ये वाढ दिसून आली. सीतारामन यांनी आपल्या भाषणात सांगितले की, 2070 पर्यंत ‘नेट-झिरो’चे लक्ष्य साध्य करण्यासाठी अनेक उपाययोजना केल्या जातील. यामध्ये ऑफशोर विंड एनर्जी साठी वायबिलिटी गैप फंडिंग आणि एक कोटी कुटुंबांना दरमहा 300 युनिटपर्यंत मोफत वीज मिळण्यासाठी सौर पॅनेल बसवणे यांचा समावेश आहे. या घोषणांदरम्यान, वीज आणि उर्जा शेअर्समध्ये तेजी आली आहे.

अर्थसंकल्पातील घोषणांदरम्यान एनटीपीसीच्या शेअर्समध्ये वाढ झाली आहे. हा शेअर 1.32 टक्क्यांच्या वाढीसह 321.75 रुपयांवर बंद झाला. याशिवाय NHPC चे शेअर्स 0.45 टक्क्यांनी वधारले आणि 91.40 रुपयांवर बंद झाले. आजच्या ट्रेडिंग सत्रात सुझलॉन एनर्जीचा शेअर 5 टक्क्यांच्या अपर सर्किटला गेला. यासोबतच बोरोसिल रिन्युएबल्स, वारी रिन्युएबल टेक्नॉलॉजीज, स्टर्लिंग विल्सन रिन्युएबल एनर्जी या शेअर्समध्येही आज 2 टक्क्यांहून अधिक वाढ झाली आहे. तर दुसरीकडे टाटा पॉवरचे शेअर्स 0.21 टक्क्यांनी आणि जेएसडब्ल्यू एनर्जीचे शेअर्स 2.52 टक्क्यांनी घसरले.

दरम्यान, मागील अर्थसंकल्पात, नवीन आणि नवीकरणीय ऊर्जा मंत्रालयासाठी 10,222 कोटी रुपये राखून ठेवण्यात आले होते, जे वर्षानुवर्षे 45 टक्क्यांनी वाढले आहे. ऊर्जा मंत्रालयाला 20,671 कोटी रुपयांचे वाटप करण्यात आले होते, जे एका वर्षापूर्वी 58 टक्क्यांनी जास्त होते.

अर्थसंकल्पात केली ही घोषणा –

रिन्यूएबल एनर्जी क्षेत्राबाबत घोषणा करताना निर्मला सीतारामन म्हणाल्या की, प्रधानमंत्री सूर्योदय योजनेंतर्गत 1 कोटी घरांच्या छतावर सौर पॅनेल बसवण्यात येणार आहेत. त्यामुळे घरांना 300 युनिट मोफत वीज मिळणार आहे. देशातील अनेक राज्यांतील वीज मंडळे मोफत वीज योजनांमुळे दिवाळखोरीच्या उंबरठ्यावर असताना, ही मोफत योजना एक नवा आदर्श सादर करते.