प्रभात वृत्तसेवा
पुणे – उन्हामुळे घराचे छत तापून एसीचे वीजबिल वाढविण्यापेक्षा त्याच छतावर प्रधानमंत्री सूर्यघर योजनेतून सौर प्रकल्प उभारण्याचा पर्याय १८ हजार ६९४ पुणेकरांनी पसंत केला आहे. या योजनेतून त्यांना १५१ कोटींचे अनुदान देखील मिळाले असून, ९०.६२ मेगावॅट इतकी वीजनिर्मिती होत आहे, अशी माहिती महावितरणचे पुणे परिमंडलचे मुख्य अभियंता सुनील काकडे यांनी दिली.

महाराष्ट्रात २ लाख ९१ हजार ८११ घरांवर असे प्रकल्प साकारले असून, त्याची क्षमता १ हजार १०० मेगावॅटवर पोहोचली आहे. पुणे परिमंडलातही या योजनेचा टक्का दिवसेंदिवस वाढत आहे. आतापर्यंत ३१ हजार ६४९ घरगुती ग्राहकांनी सूर्यघरसाठी नोंदणी केली असून, पैकी १८ हजार ६९४ घरांवर प्रकल्प कार्यान्वित झाले आहेत. ७ हजार ३९७ प्रकल्पांचे काम अंतिम टप्प्यात आहे, असे काकडे यांनी सांगितले.

असे मिळते अनुदान..
ज्या ग्राहकांचा वीजवापर ३०० युनिटच्या घरात आहे, त्यांच्यासाठी ३ किलोवॅट क्षमतेचा सूर्यघर प्रकल्प पुरेसा आहे. यातून साधारणपणे ३०० ते ३६० युनिट वीज महिन्याला तयार होते. पहिल्या दोन किलोवॅटपर्यंत प्रतिकिलोवॅट ३० हजार रुपये, तर ३ किलोवॅट प्रकल्पाला ७८ हजारांचे अनुदान केंद्र सरकारकडून मिळते. गृहनिर्माण संस्थांना प्रतिकिलोवॅट १८ हजार रुपये प्रमाणे ५०० किलावॅट क्षमतेपर्यंतचे अनुदान दिले जाते.

स्वस्तात कर्ज उपलब्ध..
ज्यांना प्रकल्प बसविण्याची इच्छा आहे; परंतु आर्थिक अडचणींमुळे शक्य होत नाही. अशांसाठी केंद्राने ‘जनसमर्थ’ पोर्टल विकसित केले आहे. प्रकल्पाची नोंदणी महावितरणच्या https://www.mahadiscom.in/ismart/ या पोर्टलवर केल्यानंतर https://www.jansamarth.in/register पोर्टलवर कर्जाची मागणी करता येते. नामांकित राष्ट्रीय बँका ‘जनसमर्थ पोर्टल’द्वारे ९० टक्के कर्ज उपलब्ध करुन देतात. विशेष म्हणजे याचा व्याजदर गृहकर्जापेक्षाही कमी असल्याचे काकडे यांनी सांगितले.