Borghat News – पुणे-मुंबई द्रुतगती महामार्गावरील बोरघाट परिसरात संरक्षण जाळीत अडकून राहिलेला सुमारे पाच टन वजनाचा मोठा दगड सुरक्षितरीत्या हटविण्यात आल्याने संभाव्य अपघात टळला आहे. महामार्ग पोलीस, महाराष्ट्र राज्य रस्ते विकास महामंडळ, आयआरबी आणि तांत्रिक पथकांच्या संयुक्त कारवाईमुळे ही मोहीम यशस्वीरित्या पार पडली. पुणे-मुंबई द्रुतगती महामार्गाच्या मुंबई मार्गिकेवर ओडीशी बोगदा परिसरात सुमारे ५० फूट उंचीवर हा मोठा दगड संरक्षण जाळीत अडकून राहिल्याचे निदर्शनास आले.

पावसाळ्याच्या पार्श्वभूमीवर हा दगड खाली कोसळल्यास गंभीर अपघात होण्याची शक्यता होती. घटनेची माहिती मिळताच महामार्ग पोलीस केंद्र बोरघाटचे प्रभारी अधिकारी स्वप्नील पाटील यांनी वरिष्ठ अधिकाऱ्यांना तातडीने माहिती दिली. त्यानंतर पोलीस अधीक्षक तिरुपती काकडे यांच्या मार्गदर्शनाखाली सर्व यंत्रणांशी समन्वय साधून तातडीची उपाययोजना करण्यात आली. या कारवाईसाठी अपर पोलीस महासंचालक (वाहतूक) प्रवीण सांखळे यांनी आदेश जारी करून गुरूवारी दुपारी १२ ते २ या कालावधीत संबंधित भागातील वाहतूक नियंत्रित करण्याचे निर्देश दिले होते.

त्यामुळे दगड हटविण्याचे काम सुरक्षितपणे पूर्ण करता आले. या मोहिमेत पोलीस अधीक्षक तिरुपती काकडे, पोलीस उपअधीक्षक पुष्पलता दिघे-मंडव, पोलीस निरीक्षक भरत शेंडगे, प्रभारी अधिकारी स्वप्नील पाटील तसेच महामार्ग पोलीस केंद्र पळस्पे, खंडाळा आणि वडगाव येथील अधिकारी आणि कर्मचारी सहभागी झाले होते.संपूर्ण कारवाईदरम्यान सर्व यंत्रणांमध्ये उत्कृष्ट समन्वय राखण्यात आला. त्यामुळे कोणतीही जीवितहानी अथवा अपघात न घडता दुपारी १.४० वाजेपर्यंत दगड सुरक्षितपणे खाली उतरविण्यात आला. त्यानंतर महामार्गावरील दोन्ही बाजूंची वाहतूक पुन्हा सुरळीत करण्यात आली.