पटना: बिहारचे मुख्यमंत्री नितीश कुमार यांनी भाजपचे राष्ट्रीय अध्यक्ष जेपी नड्डा यांची भेट घेतल्यानंतर आता राज्यातील मंत्रिमंडळ विस्तार लवकरच होणार आहे. नड्डा यांच्यासोबत झालेल्या बैठकीत मंत्रिमंडळ विस्तारावर एकमत झाल्याचे बोलले जात आहे. मुख्यमंत्री नितेशकुमार आणि नड्ड़ा यांच्यात झालेल्या बैठकीत संभाव्य मंत्र्यांच्या नावावर चर्चा झाली असून त्या नावांवर एकमत झाल्याचे समजते. राज्यातील मंत्रीमंडळाचा विस्तार विधिमंडळाच्या अर्थसंकल्पीय अधिवेशनापूर्वी होऊ शकतो, असे सांगितले जात आहे.

बिहार सरकारमध्ये एकूण 30 मंत्री असून त्यात मुख्यमंत्री नितीश कुमार आणि दोन उपमुख्यमंत्र्यांचा समावेश आहे. बिहार विधानसभेच्या रचनेचा विचार करता मंत्रिमंडळात जास्तीत जास्त 36 मंत्री असू शकतात. याचा अर्थ अजूनही सहा पदे रिक्त आहेत, ती नव्या मंत्र्यांकडून भरता येणार आहेत. या सहा मंत्र्यांची नावे गुलदस्त्यात ठेवण्यात आली आहेत.

या ६ नव्या मंत्र्यांमध्ये भाजपच्या कोट्यातून एकूण 5 मंत्र्यांना मंत्रीमंडळात स्थान दिले जाऊ शकते. तसेच एक-दोन जणांना मंत्रिमंडळातूनही काढले जाऊ शकते. पक्षाच्या नेत्यांच्या म्हणण्यानुसार, बिहारच्या 30 सदस्यीय मंत्रिमंडळात भाजपच्या कोट्यातील दोन उपमुख्यमंत्र्यांसह एकूण 15 मंत्री आहेत.

महसूल मंत्री डॉ. दिलीप जयस्वाल हे भाजपचे प्रदेशाध्यक्ष आहेत. यामुळे त्यांना मंत्री पदावरून पाय उतार होऊ लागण्याची शक्यता आहे. या पदावर पक्षाकडून चर्चेत असलेल्या नावांमध्ये नवल किशोर यादव यांना मंत्री केले जाऊ शकते.

जीवेश कुमार आणि अनिल शर्मा यांना देखील मंत्री पदाची संधी नितेशकुमार देऊ शकतात. तसेच कविता देवी यांच्या गळ्यात मंत्री पदाची माळ पडू शकते. मात्र, अद्यापही जेडीयूच्या कोट्यावरच्या मंत्र्यांचा सस्पेन्स कायम आहे. याबाबतचा निर्णय जेडीयूचे सर्वेसर्वा आणि बिहार राज्याचे मुख्यमंत्री नितीशकुमार घेऊ शकतात. प्रत्येकी दोन विभाग असलेल्या मंत्र्यांकडून एक विभाग काढण्यात येऊ शकतो, असे समीकरण ठरल्याची माहिती आहे.

अर्थसंकल्पीय अधिवेशाला या तारखेपासून सुरूवात

बिहार राज्याचे अर्थसंकल्पीय अधिवेशनाला २८ फेब्रुवारीपासून सुरूवात होणार असून २८ मार्चपर्यंत हे अधिवेशन चालणार आहे. तत्पूर्वी मंत्रीमंडळ विस्तारामध्ये सामाजिक आणि जातीय समीकरणे जुळवण्याचा प्रयत्न करण्यात येणार आहे.