BJP On Karnataka Muslim Quota Bill | कर्नाटक विधानसभेत आज मुस्लिम आरक्षण विधेयक आणि हनी ट्रॅपच्या मुद्यांवरून मोठा गोंधळ झाल्याचे पाहायला मिळाले. कर्नाटक सरकारकडून सरकारी कंत्राटांमध्ये मुस्लिमांना 4 टक्के आरक्षण देण्याची घोषणा करण्यात आली आहे. यासंदर्भातील विधेयकाला मंजूरी मिळाली. मात्र, यावरून कर्नाटकमधील विरोधी पक्ष असलेल्या भाजपने जोरदार विरोध केला आहे. तसेच, याबाबत कायदेशीररित्या आव्हान देणार असल्याचे म्हटले आहे.

कर्नाटकातील मुस्लिम आरक्षण विधेयकावरून भाजप खासदार संबित पात्रा यांनी काँग्रेस व राहुल गांधी यांच्यावर निशाणा साधला आहे. संबित पात्रा यांनी राहुल गांधींचा उल्लेख ‘आलमगीर राहुलजेब’ असा करत त्यांच्यावर टीका केली आहे. तसेच, त्यांच्यावर तुष्टीकरणाचा आरोप केला आहे.

पत्रकार परिषदेत बोलताना संबित पात्रा म्हणाले की, कर्नाटकमधील विधानसभेत आज एक विधेयक पारित झाले आहे, ज्यानुसार मुस्लिमांना 2 कोटी रुपयांपर्यंतच्या सरकारी कंत्राटामध्ये 4% आरक्षण मिळेल. हे आरक्षण ओबीसी कॅटेगरी 2B मध्ये दिले गेले आहे, म्हणजेच ओबीसी आणि मागासवर्गींचे अधिकार हिरावून घेतले जात आहेत. तसेच, त्यांनी राहुल गांधींच्या सांगण्यावरून सिद्धरामैया सरकारने हे विधेयक आणले असल्याचा आरोप केला.

राहुल गांधी हे राजकीयदृष्ट्या अयोग्य आहेत, म्हणूनच ते तुष्टीकरणाच्या माध्यमातून त्यांच्या महत्वाकांक्षांना पुढे ढकलण्याचा प्रयत्न करत आहेत. जे आरक्षण आज 4 टक्क्यांपासून सुरू झाले आहे, ते एक दिवस 100 टक्के करण्याची त्यांची इच्छा आहे. वक्फ बोर्ड हा ‘लँड जिहाद’ होता आणि हे ‘कॉन्ट्रॅक्ट जिहाद’ आहे. ‘कर्नाटकमधील बजेट हे ‘मुस्लिम बजेट’ आहे.’, असे म्हणत संबित पात्रा यांना राहुल गांधी व काँग्रेसवर जोरदार टीका केली.

दरम्यान, कर्नाटक सरकारने सरकारी कंत्राटांमध्ये मुस्लिमांना 4 टक्के आरक्षण देणारे विधेयक मंजूर केले आहे. मात्र, भाजपच्या नेत्यांनी या विधेयकाला जोरदार विरोध केला. विरोधी पक्षाच्या आमदारांकडून विधेयकाच्या प्रती देखील विधानसभेच्या अध्यक्षांवर भिरकावण्यात आल्या.