BJP Protest Pune – केंद्रीय गृहमंत्री अमित शहा यांच्या पुणे भेटीवेळी शहर-जिल्हा काँग्रेसतर्फे मार्केटयार्ड येथे आंदोलन केल्याने त्याला उत्तर म्हणून भारतीय जनता पक्षाचे कार्यकर्ते, पदाधिकाऱ्यांनी काँग्रेस भवनसमोर आंदोलन केले. नीट पेपरफुटी विरोधातील राजधानीतील आंदोलनावेळी विद्यार्थ्यांवर झालेल्या हल्ल्याच्या निषेधार्थ केंद्रीय गृहमंत्री अमित शहा यांच्या पुणे भेटीवेळी आंदोलन करण्याचा इशारा कॉंग्रेसने दिला होता.

त्यानुसार शनिवारी (दि.१) मार्केटयार्ड येथे आंदोलनही केले. लोकमान्य टिळक ट्रस्टने राष्ट्रीय सुरक्षा सल्लागार अजित डोवाल यांना केंद्रीय गृहमंत्री अमित शहा यांच्या हस्ते लोकमान्य टिळक पुरस्कार देण्यास कॉंग्रेसने तीव्र विरोध दर्शविला. शहा यांच्या निषेधार्थ घोषणाबाजीही करण्यात आली. कॉंग्रेसच्या आंदोलनाच्या निषेधार्थ भाजपच्या कार्यकर्ते, पदाधिकाऱ्यांनी काँग्रेसभवन समोर आंदोलन केले.

काँग्रेस आंदोलन करत टिळक पुरस्कार वितरण सोहळ्यास गालबोट लावण्याचा प्रयत्न केला. कॉंग्रेसच्या आंदोलनाला प्रतिउत्तर देण्यासाठी भाजपनेही काँग्रेसभवन समोर आंदोलन केले. आंदोलनात सुशील मेंगडे, पुनीत जोशी, पुष्कर तुळजापुरकर, अपुर्वा खाडे, तेजस मारणे आदींसह अन्य पदाधिकारी, कार्यकर्ते यांनी सहभाग घेतला. भाजपने काँग्रेसभवन येथील महात्मा गांधी यांच्या पुतळ्यास अर्पण करण्यासाठी पुष्पहार आणला होता. तो त्यांनी सुरक्षारक्षकाकडे सुपुर्द केला. कॉंग्रेसला सद्बुध्दी देवो, अशी प्रार्थनाही त्यांनी केली.