Vishwajeet Kadam : काँग्रेसने संघटना मजबूत करण्यासाठी संघटन सृजन अभियान राबवले असून त्यातून शहराला पहिल्यांदाच पूर्व व पश्चिम असे दोन शहराध्यक्ष दिले. हे शहराध्यक्ष सर्वांना सोबत घेऊन पक्ष मजबूत करतील, असा विश्वास काँग्रेसचे नेते, माजी राज्यमंत्री डॉ. विश्वजित कदम यांनी व्यक्त केला. पुण्याचा पुढील महापौर व खासदार काँग्रेसचा असेल, असा दावाही नवनियुक्त शहराध्यक्षांनी केला. पुणे शहर पूर्वचे अध्यक्ष प्रशांत जगताप तर पश्चिमचे अध्यक्ष दीप्ती चवधरी यांनी शनिवारी (दि. २३) डॉ. कदम यांच्या उपस्थितीत पदभार स्वीकारला. यावेळी प्रदेश काँग्रेसचे उपाध्यक्ष मोहन जोशी, प्रदेश प्रवक्ते गोपाळ तिवारी, पालिकेतील गटनेते ॲड. रामचंद्र उर्फ चंदूशेठ कदम, नगरसेविका दिपाली डोख, सायरा शेख, काशिफ सय्यद, रफिक शेख, साहिल केदारी, सुनील शिंदे, अश्विनी लांडगे,उपस्थित होते. तसेच वैशाली भालेराव, शानी नौशाद, महिला कॉंग्रेस अध्यक्ष स्वाती शिंदे, युवक अध्यक्ष सौरभ अमराळे, सेवादल अध्यक्ष लतेंद्र भिंगारे, एन.एस.यु.आय. अध्यक्ष अभिजीत गोरे आदी पदाधिकारी, कार्यकर्ते उपस्थित होते. दोन्ही शहराध्यक्ष अनुभवी असून दोघांनीही महापौर म्हणून काम केले आहे. चवधरी यांनी विधान परिषदेतही प्रतिनिधित्व केल्याचे कदम यांनी नमूद केले. यावेळी मावळते शहराध्यक्ष अरविंद शिंदे, माजी राज्यमंत्री रमेश बागवे, त्यांचे पुत्र माजी नगरसेवक अविनाश बागवे उपस्थित नव्हते.शिंदे यांच्या घराण्याकडून दरवर्षी पंढरपूर येथे विठोबाची महापूजा केली जाते. त्यामुळे ते उपस्थित राहिले नाहीत. त्याची पूर्वकल्पना त्यांनी दिली होती, असे कदम यांनी सांगितले.