Ram Kadam on Raj Thackeray | महाराष्ट्र नवनिर्माण सेनेचे अध्यक्ष राज ठाकरे यांनी महाकुंभमेळा आणि गंगा नंदीच्या पाण्यावरून केलेल्या वक्तव्यामुळे नवीन वाद निर्माण झाला आहे. गंगा नदीचे पाणी कोण पिणार? असा सवाल करत राज ठाकरेंनी महाकुंभमेळ्यातील गंगा स्नानाची खिल्ली उडवली होती. यावरून आता भाजपकडून त्यांच्यावर निशाणा साधण्यात आला आहे. जे कुंभमेळ्याला गेलेच नाहीत त्यांनी घरी बसून पाणी अस्वच्छ असे म्हणणे चुकीचे आहे, असे टोला भाजप आमदार राम कदम यांनी राज ठाकरेंना लगावला आहे.

काल (9 मार्च) मनसेच्या 19व्या वर्धापन दिनाचा कार्यक्रम पार पडला. पिंपरी-चिंचवड येथे पार पडलेल्या या कार्यक्रमात राज ठाकरे यांनी पक्षाच्या कार्यकर्त्यांशी संवाद साधला. यावेळी बोलताना राज ठाकरे म्हणाले की, बाळा नांदगावकर यांनी छोट्याशा कमंडलूमध्ये गंगेचे पाणी आणले होते. त्यावर मी हड्ड.. हे पाणी पिणार नाही, असे म्हटले.

राज ठाकरेंच्या या वक्तव्यानंतर आता भाजपकडून टीका करण्यात आली आहे. राज ठाकरेंच्या विधानावर एका टीव्ही चॅनेलशी बोलताना भाजप आमदार राम कदम म्हणाले की, मी स्वतः माझ्या कुटुंबासमोर 3 वेळा कुंभमेळ्यात पवित्र स्नान केले. अनेक नेते, अभिनेते, उद्योगपती, साधू-संत तेथे पवित्र स्नानासाठी गेले.  माझा स्वतःचा अनुभव आहे की, तिथले पाणी स्वच्छ होते. त्यामुळे जे गेलेच नसतील त्यांनी घरी बसून पाणी अस्वच्छ असे म्हणणे चुकीचे आहे.

‘मोदी सरकारने नद्या स्वच्छ करण्याचा प्रयत्न करत आहे. गंगा नदीत आतापर्यंत लाखो फॅक्टरी आणि गटारांचे आऊटलेट्स होते. आता ते बऱ्यापैकी कमी झाले आहे, असेही ते म्हणाले.

गंगा नदीच्या पाण्यावर काय म्हणाले होते राज ठाकरे?

पिंपरी-चिंचवडमध्ये बोलताना राज ठाकरेंनी महाकुंभ आणि गंगा नदीच्या पाण्यावर भाष्य केले. यावेळी ते म्हणाले की, काही पदाधिकारी कुंभमेळ्याला गेले होते. मी त्यांना विचारले आल्यावर आंघोळ केली ना? बाळा नांदगावकर यांनी छोट्याशा कमंडलूमध्ये गंगेचे पाणी आणले होते. त्यावर मी हड्ड.. हे पाणी पिणार नाही, असे म्हटले. सोशल मीडियावर पाहतोय लोक तिकडं आघोळ करतात.

‘बाळा नांदगावकर येऊन म्हणत आहेत की हे घ्या गंगेचे पाणी. कोण पिणार ते पाणी? आताच कोरोना गेलाय. दोन वर्षे तोंडाला फडकी बांधून फिरले आणि आता तिकडे जाऊन अंघोळ करत आहेत.’, असे ते म्हणाले.