Mla Rajesh Pawar : नांदेड जिल्ह्यातील भाजप आमदार राजेश पवार यांच्याविरोधात न्यायालयाने तपासाचे आदेश दिल्याने राजकीय वर्तुळात खळबळ उडाली आहे. नायगाव न्यायालयाने फौजदारी प्रक्रिया संहितेच्या कलम 156(3) अंतर्गत पोलिसांना चौकशी करण्याचे निर्देश दिले आहेत. हे प्रकरण आमदार पवार आणि त्यांच्या नातेवाईकांशी संबंधित असून, त्यांनी चुलत भाऊ श्रीराम पवार यांना जीवे मारण्याची धमकी दिल्याचा आरोप आहे. श्रीराम पवार हे सुमारे 70 टक्के दिव्यांग असून, त्यांनी जून 2023 मध्ये याबाबत तक्रार दाखल केली होती. मिळालेल्या माहितीनुसार, टेंभुर्णी (ता. नायगाव) येथील गट क्रमांक 179 मधील आपल्या शेतात श्रीराम पवार यांनी उदरनिर्वाहासाठी बांबूची लागवड केली होती. 24 जून 2023 रोजी संध्याकाळी काही जण जेसीबी मशिनसह शेतात घुसले आणि बांबूचे पीक तोडण्यास सुरुवात केली. विरोध केल्यानंतर, “न्यायालयीन दावा मागे घे, नाहीतर परिणाम भोगावे लागतील” अशी धमकी देण्यात आली. तसेच जीवे मारण्याचीही धमकी दिल्याचा आरोप तक्रारीत करण्यात आला आहे. घटनेनंतर पीडिताने पोलीस, तहसीलदार आणि जिल्हाधिकाऱ्यांकडे दाद मागितली होती. मात्र, पोलिसांनी हे प्रकरण दिवाणी असल्याचे सांगत गुन्हा दाखल करण्यास टाळाटाळ केल्याचा आरोप आहे. अखेर पीडिताने न्यायालयात धाव घेतली. सुरुवातीला अर्ज फेटाळण्यात आला होता, पण जिल्हा न्यायालयाच्या हस्तक्षेपानंतर प्रकरण पुन्हा सुनावणीसाठी आले. सदर प्रकरण दखलपात्र स्वरूपाचे असल्याचे नमूद करत न्यायालयाने आता पोलिस तपासाचे आदेश दिले आहेत. यामुळे नांदेडमध्ये राजकीय चर्चांना उधाण आले आहे.
