नागपूर : केंद्रीय राज्यमंत्री रक्षा खडसे यांच्या मुलीची जळगाव जिल्ह्यातील मुक्ताईनगर तालुक्यातील कोथळी गावात संत मुक्ताई यात्रेत छेड काढण्यात आली आहे. या प्रकरणी पीडितेचे आजोबा माजी मंत्री एकनाथ खडसे आणि आई केंद्रीय राज्यमंत्री रक्षा खडसे यांनी पोलिसात तक्रार दिली आहे. तक्रार देऊन दोन दिवस झाले तरी पोलिसांकडून आरोपींवर कारवाई झालेली नाही.

केंद्रीय मंत्र्यांच्या मुलीच्या छेडछाड प्रकरणी जर महाराष्ट्रातील पोलीस कारवाई करत नसतील तर सर्वसामान्य आई-वडिलांच्या लेकी बाळींच्या सुरक्षा कशी असणार, असा सवाल काँग्रेस नेते आणि माजी विरोधी पक्षनेता विजय वडेट्टीवार यांनी केला आहे. राज्यातील कायदा सुव्यवस्थेचे वास्तव या घटनेमुळे समोर आले आहे, अशी टीका काँग्रेस नेत्यांनी केला आहे. राज्यात पोलिस मंत्र्यांचेही ऐकत नाहीत, कारण गुंडांना सरकारमधील मंत्र्यांचेच संरक्षण आहे. भाजपच्याच केंद्रीय मंत्र्यांनी महायुती सरकारला आता आरसा दाखवला आहे, असा टोला वडेट्टीवार यांनी लगावला.

काँग्रेस आमदार विजय वडेट्टीवार यांनी सोशल मीडियावर पोस्ट करुन महायुती सरकारवर निशाणा साधला आहे. राज्यात पोलिसांचा धाक राहिला नाही, कारण गुंडाना महायुतीचे राजकीय संरक्षण मिळत आहे, असाही आरोप त्यांनी केला. विजय वडेट्टीवार म्हणाले, पोलिस सुरक्षा असताना केंद्रीय मंत्र्यांच्या मुली आज महाराष्ट्रात सुखरूप नाही, तिथे शेतात, नोकरीवर जाणाऱ्या सामान्य आई-वडिलांच्या मुली दररोज स्वतःला सुरक्षित ठेवण्यासाठी काय ‘स्ट्रगल’ करत असतील आणि किती मानसिक त्रास त्यांना सहन करावा लागत असेल, हा अंदाज महायुतीतील मंत्र्यांना नाही.