MLC Election : पुणे शिक्षक मतदारसंघातून भाजपचा उमेदवार जाहीर; शिवसेनेचे चिवटे यांचा पत्ता कट?
MLC Election : महाराष्ट्र विधान परिषदेच्या पुणे विभाग शिक्षक मतदारसंघाच्या आगामी निवडणुकीसाठी महायुतीतील जागावाटपाचा तिढा सुटल्याचे संकेत मिळत आहेत.
MLC Election : महाराष्ट्र विधान परिषदेच्या पुणे विभाग शिक्षक मतदारसंघाच्या निवडणुकीसाठी महायुतीतील जागावाटपाचा मुद्दा गेल्या काही दिवसांपासून चर्चेत आहे. या जागेवर भाजप आणि शिवसेना (शिंदे गट) या दोन्ही पक्षांकडून दावा करण्यात येत होता. आता पुणे शिक्षक मतदारसंघ भाजपला देण्याचा निर्णय झाल्याची माहिती समोर आली असून, भाजपकडून कौस्तुभ गावडे यांना उमेदवारी जाहीर करण्यात आली आहे. (MLC Election)
कौस्तुभ गावडे हे श्री स्वामी विवेकानंद शिक्षण संस्थेचे मुख्य कार्यकारी अधिकारी असून, शिक्षण क्षेत्रात त्यांचे काम आहे. महाराष्ट्र शिक्षक लोकशाही आघाडीने (TDF) ऑगस्टमध्येच पुणे विभाग शिक्षक मतदारसंघासाठी त्यांना पुरस्कृत उमेदवार म्हणून जाहीर केले होते. शिक्षकांची जुनी पेन्शन योजना, विनाअनुदानित शाळांचे प्रश्न, पवित्र पोर्टल आणि शिक्षकांच्या अन्य प्रलंबित प्रश्नांवर त्यांनी भूमिका मांडली आहे. (MLC Election)
महायुतीत पुणे शिक्षक मतदारसंघावरून रस्सीखेच
पुणे शिक्षक मतदारसंघासाठी शिवसेनेकडून मंगेश चिवटे, तसेच सचिन सानप यांची नावे चर्चेत होती. दुसरीकडे भाजपकडून कौस्तुभ गावडे यांच्या नावाचा आग्रह असल्याचे वृत्त समोर आले होते. त्यामुळे महायुतीतील जागावाटपाकडे राजकीय वर्तुळाचे लक्ष लागले होते. (MLC Election)
मंगेश चिवटे यांनीही शिंदे यांच्या नेतृत्वाखालील शिवसेनेकडून पुणे शिक्षक मतदारसंघातून निवडणूक लढवण्याची घोषणा केली आहे. त्यामुळे भाजपकडून गावडे आणि शिवसेनेकडून चिवटे यांच्यातील उमेदवारीचा विषय महायुतीसाठी महत्त्वाचा ठरला होता. (MLC Election)
कौस्तुभ गावडे काय म्हणाले?
शिक्षक मतदारसंघातील मतदारांना केवळ आश्वासने न देता जाहीरनामा देण्यावर भर राहील, असे कौस्तुभ गावडे यांनी सांगितले आहे. जुनी पेन्शन योजना आणि शिक्षकांचे अन्य प्रलंबित प्रश्न सोडवण्यासाठी काम करण्याची भूमिका त्यांनी मांडली आहे. (MLC Election)
२३ ऑक्टोबरला मतदान
महाराष्ट्र विधान परिषदेच्या तीन पदवीधर आणि दोन शिक्षक मतदारसंघांसाठी २३ ऑक्टोबर २०२६ रोजी मतदान होणार आहे. उमेदवारी अर्ज दाखल करण्याची अंतिम तारीख ६ ऑक्टोबर आहे. ७ ऑक्टोबरला अर्जांची छाननी होणार असून ९ ऑक्टोबरपर्यंत उमेदवारी अर्ज मागे घेता येणार आहेत. मतमोजणी २७ ऑक्टोबरला होणार आहे. (MLC Election)
पुणे शिक्षक मतदारसंघात काँग्रेसचे विद्यमान आमदार जयंत आसगावकर पुन्हा निवडणुकीच्या रिंगणात असण्याची शक्यता आहे. त्यामुळे भाजपचा अधिकृत उमेदवार, शिवसेनेची भूमिका आणि विरोधकांची उमेदवारी स्पष्ट झाल्यानंतर या मतदारसंघातील निवडणुकीचे चित्र अधिक स्पष्ट होणार आहे. (MLC Election)
