MLC Election : विधान परिषदेच्या शिक्षक आणि पदवीधर मतदारसंघांच्या निवडणुकीची घोषणा झाल्यानंतर राजकीय पक्षांकडून उमेदवार निश्चित करण्यास वेग आला आहे. काँग्रेसने अमरावती विभाग शिक्षक मतदारसंघासाठी अदिती ऋषिकेश पोहरे यांची उमेदवारी जाहीर केली आहे. पक्षप्रवेशाच्या कार्यक्रमातच त्यांच्या उमेदवारीची घोषणा करण्यात आली.

मुंबईतील टिळक भवन येथे काँग्रेसचे महाराष्ट्र प्रभारी डॉ. सिरिवेल्ला प्रसाद आणि प्रदेशाध्यक्ष हर्षवर्धन सपकाळ यांच्या उपस्थितीत अदिती पोहरे यांनी काँग्रेसमध्ये प्रवेश केला. यावेळी काँग्रेस नेत्या यशोमती ठाकूर यांनी त्यांच्या उमेदवारीची घोषणा केली.

अमरावती शिक्षक मतदारसंघात अमरावती, अकोला, बुलढाणा, वाशिम आणि यवतमाळ या पाच जिल्ह्यांचा समावेश आहे. अदिती पोहरे या अभियांत्रिकी शिक्षण क्षेत्रातील प्राध्यापक असून त्यांनी बी.ई. (सिव्हिल इंजिनिअरिंग), एम.ई. (स्ट्रक्चरल डिझाईन) आणि एम.ए. (मानसशास्त्र) शिक्षण घेतले आहे. शासकीय अभियांत्रिकी महाविद्यालयात अध्यापनाचा त्यांना अनुभव आहे.

अदिती पोहरे यांचा शिक्षण क्षेत्राशी संबंधित कुटुंबीयांशी संबंध आहे. त्या श्री शिवाजी शिक्षण संस्थेचे अध्यक्ष हर्षवर्धन देशमुख यांच्या कन्या आहेत. त्यांचे सासरे प्रकाश पोहरे हे ‘देशोन्नती’चे संस्थापक संपादक आहेत. या मतदारसंघात श्री शिवाजी शिक्षण संस्थेचे मोठे जाळे असल्याने पोहरे यांच्या उमेदवारीकडे लक्ष लागले आहे.

दरम्यान, महायुतीमध्ये पुणे शिक्षक मतदारसंघाच्या जागेवर भाजप आणि शिवसेनेमध्ये चर्चा सुरू असल्याचे सांगितले जात आहे.

निवडणूक वेळापत्रक : उमेदवारी अर्ज भरण्याची अंतिम तारीख ६ ऑक्टोबर, छाननी ७ ऑक्टोबर, अर्ज मागे घेण्याची अंतिम तारीख ९ ऑक्टोबर आहे. मतदान २३ ऑक्टोबरला सकाळी ८ ते दुपारी ४ या वेळेत होईल. मतमोजणी २७ ऑक्टोबरला होणार आहे.