Top 10 News : १) विधानपरिषदेच्या निवडणुकीसाठी भाजपचे तीन उमेदवार जाहीर

महाराष्ट्र विधान परिषदेच्या पदवीधर आणि शिक्षक मतदारसंघांच्या निवडणुकीसाठी भाजपने तीन उमेदवारांची घोषणा केलीय. पुणे विभाग पदवीधर मतदारसंघातून डॉ. स्मिता योगेश जाधव, नागपूर विभाग पदवीधर मतदारसंघातून सुधाकर विठ्ठलराव कोहळे, तर पुणे विभाग शिक्षक मतदारसंघातून कौस्तुभ मुरलीधर गावडे यांना उमेदवारी देण्यात आलीय. राज्यात विधान परिषदेच्या पाच जागांसाठी निवडणूक होत असून मतदान २३ ऑक्टोबरला आणि मतमोजणी २७ ऑक्टोबरला होणार आहे. उमेदवारी अर्ज दाखल करण्याची अंतिम तारीख ६ ऑक्टोबर आहे. पुणे शिक्षक मतदारसंघासाठी महायुतीत झालेल्या चर्चेनंतर भाजपने कौस्तुभ गावडे यांना उमेदवारी दिलीय. (Top 10 News)

2) ज्ञानेश कुमार म्हणजे अडाणी कुमार; विराट गर्जना मोर्चात ठाकरे बंधूंचा सरकारवर घणाघात

मुंबईत झालेल्या ‘विराट गर्जना मोर्चा’नंतरच्या सभेत मनसे अध्यक्ष राज ठाकरे यांनी निवडणूक प्रक्रियेबाबत दोन प्रमुख मागण्या केल्यात. महाराष्ट्रातील सुरू असलेली SIR प्रक्रिया रद्द करावी आणि भविष्यात ईव्हीएमऐवजी बॅलेट पेपरवर मतदान घ्यावे, अशी मागणी त्यांनी केलीय. SIR प्रक्रियेमुळे मोठ्या संख्येने मतदारांची नावे प्रारूप मतदार यादीत नसल्याचा दावा राज ठाकरे यांनी केलाय. मात्र, निवडणूक यंत्रणेने स्पष्ट केले आहे की सुमारे २.07 कोटी मतदारांची गणना फॉर्म जमा न झाल्याने त्यांची नावे प्रारूप यादीत समाविष्ट झालेली नाहीत; ही अंतिम मतदार कपात मानता येणार नाही. दरम्यान, उद्धव ठाकरे यांनीही मुख्य निवडणूक आयुक्त ज्ञानेश कुमार यांच्या राजीनाम्याची मागणी केलीय. काँग्रेस आणि राष्ट्रवादी काँग्रेस (शरद पवार) गटाचे नेतेही मोर्चात सहभागी झाले होते. (Top 10 News)

3) भाजपला मोठा धक्का, उमेदवारी नाकारल्याने गडकरींचे खंदे समर्थक बंडाच्या तयारीत

नागपूर विभाग पदवीधर मतदारसंघासाठी भाजपने सुधाकर कोहळे यांची उमेदवारी जाहीर केल्यानंतर पक्षातील अंतर्गत नाराजीची चर्चा सुरू झालीय. या जागेसाठी माजी आमदार अनिल सोले आणि सुधाकर कोहळे यांच्यात उमेदवारीवरून स्पर्धा होती. अखेर भाजपने कोहळे यांच्या नावावर शिक्कामोर्तब केले. त्यानंतर अनिल सोले अपक्ष म्हणून उमेदवारी अर्ज दाखल करण्याची शक्यता आहे. सोले यांनी याआधीच मतदारसंघात प्रचाराला सुरुवात केली होती. ते केंद्रीय मंत्री नितीन गडकरी यांचे निकटवर्तीय आणि सहकारी म्हणून ओळखले जातात. दरम्यान, उमेदवारी जाहीर झाल्यानंतर सुधाकर कोहळे यांनी मुख्यमंत्री देवेंद्र फडणवीस यांची भेट घेतली. कोहळे यांनी अनिल सोले हे आपले गुरू असून, त्यांची नाराजी नसल्याचे म्हटलेय. काँग्रेसकडून अभिजित वंजारी पुन्हा मैदानात असल्याने नागपूरमध्ये आता भाजपमधील संभाव्य बंडखोरीकडे लक्ष लागलेय. (Top 10 News)

4) पुन्हा लाखो मराठे जमणार; आता शेतकऱ्यांसाठी मनोज जरांगेंचं मोठं आवाहन

मराठा आंदोलक मनोज जरांगे पाटील यांनी यंदाही बीड जिल्ह्यातील नारायणगड येथे होणाऱ्या दसरा मेळाव्यासाठी मराठा समाज बांधवांनी मोठ्या संख्येने उपस्थित राहावे, असे आवाहन केलेय. जालन्यात बोलताना त्यांनी शेतकऱ्यांच्या प्रश्नांसह मराठा आरक्षण आणि निवडणूक आयोगाच्या मुद्द्यावरही भूमिका मांडली. दुष्काळ आणि पिकांच्या नुकसानीच्या पार्श्वभूमीवर शेतकऱ्यांना हेक्टरी एक लाख रुपयांची मदत द्यावी, तसेच कर्जमाफी आणि चारा छावण्यांबाबत सरकारने निर्णय घ्यावा, अशी मागणी त्यांनी केली. निवडणूक आयुक्त ज्ञानेश कुमार यांच्याबाबतही जरांगे यांनी सरकारवर टीका करत त्यांना पदावरून हटवण्याची मागणी केली. दरम्यान, मराठा आंदोलकांना त्रास दिला जात असल्याचा आरोप करत, सरकारकडून दबाव टाकला तरी समाजाने एकत्र राहावे, असे आवाहन त्यांनी केले. (Top 10 News)

5) RNO – दुष्काळग्रस्त शेतकऱ्यांना दिवाळीपूर्वी मदत? बावनकुळेंचं मोठं आश्वासन

जळगाव जिल्ह्यातील एरंडोल तालुक्यात महसूल मंत्री चंद्रशेखर बावनकुळे यांनी दुष्काळामुळे नुकसान झालेल्या शेतीची पाहणी केली. यावेळी शेतकऱ्यांशी संवाद साधत त्यांच्या अडचणी जाणून घेत त्यांनी दुष्काळग्रस्त शेतकऱ्यांना दिवाळीपूर्वी मदत देण्यासाठी सरकार सकारात्मक असल्याचे सांगितले. राज्यातील दुष्काळी परिस्थितीच्या पार्श्वभूमीवर अचूक पंचनामे आणि नुकसानाचा अहवाल तयार करण्यावर सरकारचा भर आहे. शेतकऱ्यांना पीककर्ज आणि कृषीपंप वीजजोडणी देताना बँका व महावितरणने टाळाटाळ करू नये, अशा सूचनाही बावनकुळे यांनी दिल्या. प्रलंबित ई-केवायसीसाठी पात्र शेतकऱ्यांच्या घरी जाऊन प्रक्रिया पूर्ण करण्याचे निर्देश प्रशासनाला देण्यात आले. (Top 10 News)

6) RNO – ‘सोमेश्वर’साठी युगेंद्र पवारांचा १६ मुद्द्यांचा जाहीरनामा; शेतकऱ्यांना सर्वाधिक ऊसदराचे आश्वासन

बारामती तालुक्यातील श्री सोमेश्वर सहकारी साखर कारखान्याच्या निवडणुकीच्या पार्श्वभूमीवर राष्ट्रवादी काँग्रेस शरदचंद्र पवार पक्ष पुरस्कृत पॅनेलचा १६ मुद्द्यांचा जाहीरनामा युवा नेते युगेंद्र पवार यांनी प्रसिद्ध केलाय. शरद पवार यांच्या मार्गदर्शनाखाली तयार करण्यात आलेल्या या जाहीरनाम्यात शेतकऱ्यांना राज्यातील सर्वाधिक ऊसदर देण्याचे आश्वासन देण्यात आलेय. त्यासोबतच ऊसतोडणी आणि वाहतूक व्यवस्था अधिक सक्षम करणे, कृत्रिम बुद्धिमत्तेचा वापर, उपपदार्थ निर्मिती, पारदर्शक कारभार, तक्रार निवारण व्यवस्था आणि आधुनिक कृषी सेवा केंद्र उभारण्याचे मुद्दे मांडण्यात आलेत. कारखान्याच्या कारभारात भ्रष्टाचार खपवून घेतला जाणार नसल्याचे युगेंद्र पवार यांनी सांगितले. (Top 10 News)

7) RNO – दहा एकर सोयाबीनवर फिरवला ट्रॅक्टरचा नांगर; पावसाअभावी पीक करपलं, शेतकरी हताश

धाराशिव जिल्ह्यातील कळंब तालुक्यातील हसेगाव येथे पावसाअभावी सोयाबीनचे पीक करपल्याने शेतकऱ्याने उभ्या पिकावर ट्रॅक्टरचा नांगर फिरवला. बसलिंग सोनटक्के यांनी सुमारे दहा एकर क्षेत्रात सोयाबीनची लागवड केली होती. पेरणीपासून संगोपनापर्यंत खर्च करूनही पावसाअभावी पीक हातचे गेले. नुकसान झालेल्या पिकाचा पंचनामा होऊन शासनाकडून मदत मिळेल, अशी त्यांना अपेक्षा होती. मात्र, पंचनाम्यासाठी अधिकारी बांधावर वेळेत पोहोचले नसल्याचा आरोप त्यांनी केला. अखेर करपलेले पीक पाहणे असह्य झाल्याने आणि नुकसान भरपाईच्या प्रतीक्षेतून त्यांनी दहा एकर सोयाबीनवर नांगर फिरवण्याचा निर्णय घेतला. नुकसानग्रस्त शेतकऱ्यांच्या बांधावर तातडीने अधिकारी पाठवून पंचनामे करावेत आणि शासनाने मदत जाहीर करावी, अशी मागणी सोनटक्के यांनी केलीय. (Top 10 News)

8) RNO-एमपीएससी विद्यार्थ्यांचे आंदोलन स्थगित करा; खासदार मुरलीधर मोहोळ यांचे आवाहन

पुण्यात गेल्या चार दिवसांपासून सुरू असलेल्या एमपीएससी विद्यार्थ्यांच्या आंदोलनावर खासदार मुरलीधर मोहोळ यांनी भूमिका मांडलीय. विद्यार्थ्यांना आंदोलनाचा पूर्ण अधिकार असून, हा अधिकार लोकशाही आणि संविधानाने दिल्याचे मोहोळ यांनी म्हटलेय. मात्र, आंदोलन सुरू होण्यापूर्वीच मुख्यमंत्री देवेंद्र फडणवीस यांनी विद्यार्थ्यांशी संवाद साधून त्यांच्या पाच प्रमुख मागण्यांवर सकारात्मक चर्चा केल्याचा दावा त्यांनी केलाय. दरम्यान, रोहित पवार यांच्या शिष्टमंडळाची मुख्यमंत्र्यांसोबत बैठक झाल्यानंतर आंदोलन स्थगित करण्याची भूमिका मांडण्यात आली होती. मात्र, त्यानंतर पुण्यात पुन्हा आंदोलन सुरू झाल्याने मोहोळ यांनी विद्यार्थ्यांनी या चर्चेवर विश्वास ठेवून आंदोलन स्थगित करावे, असे आवाहन केले. (Top 10 News)

9) RNO- सातारा-देवळाईतील पाणी प्रश्न पेटला; टाकीवर चढून नागरिकांचे आंदोलन, ‘पाणी नाही तर टॅक्स नाही’

छत्रपती संभाजीनगर शहरालगतच्या सातारा-देवळाई परिसरातील पाणी प्रश्नावरून नागरिक आक्रमक झालेत. गेल्या अनेक वर्षांपासून नियमित पाणीपुरवठा होत नसल्याचा आरोप करत नागरिकांनी रविवारी पाण्याच्या टाकीवर चढून आंदोलन केले. काही नागरिकांनी टाकी परिसरात ठिय्या देत प्रशासनाविरोधात घोषणाबाजी केली. महानगरपालिका हद्दीत समावेश होऊन सुमारे दहा वर्षे उलटली, तरी अनेक वसाहतींमध्ये पिण्याच्या पाण्याची समस्या कायम असल्याचे आंदोलनकर्त्यांचे म्हणणे आहे. टँकर किंवा इतर पर्यायांवर अवलंबून राहावे लागत असल्याने नागरिकांमध्ये नाराजी आहे. प्रशासनाला आठ दिवसांची मुदत देण्यात आली असून, तोपर्यंत पाणीपुरवठा सुरळीत न झाल्यास मुख्य रस्ता बंद करून तीव्र आंदोलन करण्याचा इशारा नागरिकांनी दिला आहे. (Top 10 News)

10) ज्ञानेश कुमार यांच्या २० वर्षे जुन्या प्रकरणाची चौकशी होणार; केरळ सरकारचे आदेश

भारताचे मुख्य निवडणूक आयुक्त ज्ञानेश कुमार यांच्याशी संबंधित २००६ मधील प्रकरणाची केरळ सरकारने पुन्हा चौकशी करण्याचे आदेश दिलेत. केरळचे गृहमंत्री रमेश चेन्निथला यांनी Vigilance and Anti-Corruption Bureauला या प्रकरणात चौकशी करण्याचे निर्देश दिलेत. ज्ञानेश कुमार त्यावेळी केरळच्या सार्वजनिक बांधकाम विभागाचे सचिव होते. हे प्रकरण केरळ स्टेट ट्रान्सपोर्ट प्रोजेक्टअंतर्गत एमसी रोडच्या कामाशी संबंधित असून, या प्रकल्पाशी संबंधित मलेशियन अभियंता ली सी बीन यांच्या मृत्यूनंतर तत्कालीन Vigilance चौकशी सुरू झाली होती. दरम्यान, आधीची चौकशी पुढे का झाली नाही आणि त्यावर बाह्य दबाव किंवा हस्तक्षेप झाला होता का, याचीही तपासणी केली जाणार आहे. (Top 10 News)

11) ‘पती चोर, गोल्ड डिगर’; गोविंदाच्या कथित गर्लफ्रेंडवर राखी सावंत भडकली

अभिनेता गोविंदा आणि अभिनेत्री कोमल राणी स्वर्णकार यांच्या कथित नात्याच्या चर्चांदरम्यान अभिनेत्री राखी सावंतने केलेल्या वक्तव्यामुळे हे प्रकरण पुन्हा चर्चेत आलंय. मुंबई विमानतळावर पापाराझींशी बोलताना राखीने गोविंदाची पत्नी सुनीता अहुजाची बाजू घेत कोमल राणीवर तीव्र शब्दांत टीका केलीय. तिने कोमलला ‘पती चोर’ आणि ‘गोल्ड डिगर’ म्हटलं असून, इतरांच्या संसारात हस्तक्षेप केल्याचा आरोप केलाय. गोविंदालाही उद्देशून राखीने सुनीतासोबतच्या जवळपास चार दशकांच्या वैवाहिक आयुष्याचा आणि त्यांच्या दोन मुलांचा उल्लेख करत प्रश्न उपस्थित केले. दरम्यान, गोविंदा आणि कोमल राणी ‘रूपा’ या चित्रपटात एकत्र काम करत आहेत. दोघं लालबागचा राजा दर्शनासाठी एकत्र दिसल्यानंतर त्यांच्या नात्याबाबत चर्चा सुरू झाली होती. मात्र, कोमलने या चर्चांवर नाराजी व्यक्त करत केवळ चित्रपटासाठी एकत्र काम करत असल्याचं स्पष्ट केलंय. (Top 10 News)

12)रशियाच्या ड्रोन हल्ल्यात भारतीय फार्मा प्लांट उद्ध्वस्त; एकाचा मृत्यू, ₹400 कोटींच्या नुकसानीचा अंदाज

रशिया-युक्रेन युद्धादरम्यान युक्रेनच्या सुमी भागात भारतीय मुळांशी संबंधित कुसुम ग्रुपच्या फार्मा प्लांटवर रशियन ड्रोन हल्ला झाल्याची माहिती समोर आलीय. या हल्ल्यात एका व्यक्तीचा मृत्यू झाला असून, अनेकजण जखमी झाल्याची माहिती समोर आलीय. हल्ल्यात प्लांटच्या मुख्य इमारतीचे मोठे नुकसान झाले असून, ती बहुतांश उद्ध्वस्त झाल्याचे अधिकाऱ्यांनी सांगितले आहे. या हल्ल्यामुळे कंपनीचे किमान ४०० कोटी रुपयांचे नुकसान झाल्याचा प्राथमिक अंदाज आहे. कुसुम ग्रुपने १९९४ मध्ये भारतातून युक्रेनला औषधांची निर्यात करण्यापासून व्यवसायाला सुरुवात केलीय. २००९ मध्ये सुमी येथे कंपनीने उत्पादन प्रकल्प सुरू केला होता. युद्ध सुरू असतानाही हा प्लांट कार्यरत होता. मात्र, ताज्या ड्रोन हल्ल्यामुळे प्लांटचे मोठे नुकसान झालंय. (Top 10 News)

Top 10 News : देशावर दुहेरी संकट ते कोस्टल रोडवर भीषण अपघात..; वाचा आजच्या टॉप दहा बातम्या

13) नवीन 5-इंच TFT डिस्प्लेसह Pulsar NS400Z लाँच; किंमत 1.90 लाखांपासून

बजाज ऑटोने अपडेटेड Pulsar NS400Z भारतीय बाजारात लाँच केलीय. नव्या मॉडेलमध्ये सर्वात मोठा बदल म्हणजे 5-इंचाचा TFT डिस्प्ले देण्यात आलाय. या डिस्प्लेमध्ये Google Maps मिररिंग, म्युझिक कंट्रोल, डॉक्युमेंट स्टोरेज आणि लॅप टायमर यांसारखी फीचर्स मिळतात. बाईकमध्ये चार रायडिंग मोड्स आणि ट्रॅक्शन कंट्रोल मॅनेज करण्याची सुविधाही देण्यात आलीय. याशिवाय Bluetooth कनेक्टिव्हिटी, USB Type-C चार्जिंग पोर्ट आणि पॅनिक ब्रेक अलर्ट सिस्टम मिळते. इंजिनमध्ये 349 सीसी सिंगल-सिलिंडर लिक्विड-कूल्ड युनिट असून ते 40 हॉर्सपॉवर आणि 33 Nm टॉर्क जनरेट करते. 6-स्पीड गिअरबॉक्स, ड्युअल-चॅनल ABS आणि 43 मिमी USD फ्रंट फोर्क यांसारखी फीचर्स कायम ठेवण्यात आली आहेत. अपडेटेड NS400Z ची एक्स-शोरूम किंमत 1,90,015 आहे. (Top 10 News)

14) Jio चा 999 रुपयांचा प्लॅन म्हणजे फुल्ल पैसा वसूल; Canva Pro Lite आणि Gemini Proसह अनेक फायदे

Jioच्या 999 च्या प्रीपेड प्लॅनमध्ये ग्राहकांना 98 दिवसांची वैधता मिळते. या काळात दररोज 2GB हाय-स्पीड डेटा म्हणजेच एकूण 196GB डेटा मिळतो. यासोबत पात्र ग्राहकांना Unlimited 5G डेटाची सुविधाही मिळू शकते. प्लॅनमध्ये अनलिमिटेड व्हॉइस कॉलिंग आणि दररोज 100 SMSचा समावेश आहे. याशिवाय JioHotstar Mobile, JioTV आणि JioAICloudसारखे फायदे मिळतात. विशेष म्हणजे पात्र Jio ग्राहकांना 12 महिन्यांचे Canva Pro Lite सबस्क्रिप्शन मिळू शकते. Google AI Pro म्हणजेच Geminiचा 18 महिन्यांचा लाभही उपलब्ध आहे. यामध्ये 5TB क्लाउड स्टोरेज, Geminiमधील अतिरिक्त AI सुविधा आणि Nano Bananaसारख्या फीचर्सचा समावेश आहे. मात्र Canva आणि Geminiसाठी पात्रता व अॅक्टिव्हेशनच्या अटी लागू असून, ऑफर MyJioमध्ये तपासणे आवश्यक आहे. (Top 10 News)

15) रेस्ट ऑफ इंडियाने जिंकला इराणी कप; जम्मू-काश्मीरचे ‘डोमेस्टिक डबल’चे स्वप्न भंगले!

रणजी चॅम्पियन जम्मू-काश्मीरला नमवत रेस्ट ऑफ इंडियाने १६७ धावांनी इराणी करंडक २०२६ जिंकला. चौथ्या दिवशी रेस्ट ऑफ इंडियाचा दुसरा डाव ३२० धावांवर संपल्याने जम्मू-काश्मीरला विजयासाठी २७९ धावांचे आव्हान मिळाले होते. लक्ष्याचा पाठलाग करताना ५४ धावांची सलामी मिळूनही वेगवान गोलंदाज मुकेश कुमारच्या भेदक माऱ्यापुढे (६ विकेट्स) जम्मू-काश्मीरचा संपूर्ण संघ अवघ्या १११ धावांवर गारद झाला. आकाश दीपने ३ विकेट्स घेतल्या. कर्णधार ऋषभ पंत तापाने फणफणल्यामुळे मैदानात उतरू शकला नाही; त्याच्या अनुपस्थितीत सर्फराझ खानने संघाचे नेतृत्व करत शानदार विजय मिळवून दिला. (Top 10 News)

Top 10 News : महिनाभरापासून CSC सेंटर बंद ते पुढील वर्षीच्या पावसावरही एल निनोचं सावट..; वाचा आजच्या टॉप दहा बातम्या