बंगळुरू : कर्नाटकमधील मोर्चासाठी अखेर भाजप आणि जेडीएस हे मित्रपक्ष एकत्र आले. मुडा घोटाळ्यावरून मुख्यमंत्री सिद्धरामय्या यांनी राजीनामा द्यावा, या मागणीसाठी त्या पक्षांनी शनिवारपासून मैसुरू चलो या नावाने सात दिवसीय मोर्चा सुरू केला.मैसुरू शहरी विकास प्राधिकरणाच्या (मुडा) जमीन वाटपात घोटाळा झाला. त्याचा लाभ सिद्धरामय्या यांच्या निकटवर्तीयांना मिळाला, असा आरोप कर्नाटकमधील भाजप आणि जेडीएस हे विरोधी पक्ष करत आहेत.

कथित घोटाळ्यावरून सिद्धरामय्या आणि त्यांच्या नेतृत्वाखालील कॉंग्रेस सरकारला घेरण्यासाठी भाजपच्या पुढाकारातून मोर्चाचे आयोजन करण्यात आले. मात्र, विश्‍वासात घेतले नसल्याचे म्हणत जेडीएसने प्रारंभी मोर्चात सहभागी होण्यास नकार दर्शवला. त्यामुळे त्या मित्रपक्षांत मतभेदांची ठिणगी पडल्याचे मानले गेले. मात्र, भाजपने बहुधा समजूत काढल्याने जेडीएस मोर्चात सहभागी होण्यास राजी झाला.

त्यानंतर भाजपचे प्रदेशाध्यक्ष बी.वाय.विजयेंद्र आणि जेडीएसच्या युवक विभागाचे अध्यक्ष निखिल कुमारस्वामी यांच्या उपस्थितीत बंगळुरूमधून मोर्चाचा प्रारंभ झाला. त्या मोर्चाची सांगता १० ऑगस्टला मैसुरूमधील सभेने होईल. मोर्चामुळे कॉंग्रेस सरकारविरोधात भाजप आणि जेडीएस आक्रमक पवित्रा स्वीकारणार असल्याचे स्पष्ट होत आहे.