चंद्रपूर : चंद्रपूर जिल्ह्यातील ब्रह्मपुरी तहसीलमधील मांगली येथील एका पोल्ट्री फार्ममधून २५ जानेवारीपासून कोंबड्यांच्या मृत्यूच्या बातम्या समोर येत होत्या. त्यानुसार मृत पक्ष्यांचे नमुने प्रयोगशाळेत पाठवण्यात आले असून बर्ड फ्लूचा संसर्ग झाल्याचे स्पष्ट झाले आहे. यामुळे मांगली परिसराच्या १० किमी परिघाला ‘अलर्ट झोन’ म्हणून घोषित करण्यात आले आहे. जिल्हा दंडाधिकारी विनय गौडा यांनी मंगळवारी संबंधित विभागांना या आजाराचा सामना करण्यासाठी तातडीने उपाययोजना करण्याचे निर्देश दिले आहेत.

कोंबड्यांच्या मृत्यूची माहिती मिळताच, पशुसंवर्धन विभागाने मृत पक्ष्यांचे नमुने पुण्यातील राज्यस्तरीय प्राणी रोग संशोधन प्रयोगशाळेत आणि भोपाळमधील भारतीय कृषी संशोधन परिषद-राष्ट्रीय उच्च सुरक्षा प्राणी रोग संस्थेत पाठवले. या प्रयोगशाळांमधील अहवालांमध्ये बर्ड फ्लूच्या संसर्गाची पुष्टी झाली आहे.

संक्रमित क्षेत्रात, मांगली, गेवरलाचक आणि जुनोनटोली येथील पोल्ट्री फार्ममधील जलद प्रतिसाद पथकांद्वारे संक्रमित पक्ष्यांना वैज्ञानिक पद्धतीने मारले जाईल जेणेकरून संसर्ग पसरू नये. बाधित क्षेत्रात जनावरांचे खाद्य आणि अंडी देखील नष्ट होतील. या परिसरात वाहनांच्या हालचालीवर बंदी घालण्यात आली आहे. याशिवाय, जिवंत आणि मृत कोंबड्या, अंडी, कोंबडीचे खत, पक्षी खाद्य, संबंधित साहित्य आणि उपकरणे यांच्या वाहतुकीवरही बंदी घालण्यात आली आहे.

कधी झाली बर्ड फ्लूची एंट्री?

25 जानेवारी रोजी ब्रह्मपूरी तालु्क्यातील मंगळी गावतील पोल्ट्री फॉर्मवर काही कोंबड्या दगावल्या. ही बाब प्रशासनाला समजातच पशूपालन विभागाने धाव घेत त्याचे नमुने घेतले. नमुने पुणे आणि भोपाळ येथे पाठवण्यात आले. प्रयोगशाळेचा अहवाल प्राप्त झाला आहे. त्यानुसार या कोंबड्यांना एव्हियन इन्फ्लूएंझा एच5एन1 झाल्याचे समोर आले आहे. अहवालानंतर प्रशासन अलर्ट मोडवर आले आहे.

‘बर्ड फ्लू’चा संसर्ग कुठे?

लातूर जिल्ह्यातील उदगीर शहरांत तब्बल ५३ कावळे मृत्यूमुखी पडले होते. भोपाळ येथील वैद्यकीय प्रयोगशाळेतील अहवालानुसार या कावळ्यांचा मृत्यू ‘बर्ड फ्लू’मुळे झाल्याचे स्पष्ट झाले आहे.दुसरीकडे नागपूर जिल्ह्यातील कामठी तालुक्यात खैरी येथे एका शेतात एकाच वेळी पाच मोरांचा मृत्यू झाला आहे. वन विभागाच्या चमूने घटनास्थळी पोहोचून मृत पक्ष्यांचे शवविच्छेदन केले आणि अंत्यसंस्कार केले.

मात्र, या मोरांचा मृत्यू नेमका कशामुळे झाला आहे, ते अजून स्पष्ट झालेले नाही. मृत पक्षांच्या अवयवाचे नमुने तपासणीसाठी नागपूर येथील न्यायवैद्याक प्रयोगशाळेत तसेच भोपाळ येथील संस्थेत तपासणीसाठी पाठवण्यात येणार आहेत. कदाचित शेतातील कीटकनाशकांमुळेही मोरांचा मृत्यू झाल्याची शक्यता वर्तवण्यात येत आहे.

अंडी, चिकन खाण्यास धोका नाही

उकडलेले अंडे आणि चांगले शिजवलेले चिकन खाल्ल्याने लोकांवर कोणताही परिणाम होत नाही. ते पूर्णपणे सुरक्षित आहे. त्यामुळे लोकांना बर्ड फ्लूची भीती बाळगण्याची गरज नाही. जिल्ह्यात कुठेही पक्ष्यांचा मृत्यू झाल्यास, ताबडतोब जवळच्या पशुवैद्यकीय रुग्णालयाशी किंवा टोल-फ्री क्रमांक १९६२ वर संपर्क साधाव, असे आवाहन प्रशासनाकडून करण्यात आले आहे.

‘बर्ड फ्लू’ची लक्षणं काय आहेत?

• ताप चढणे.
• श्वास घ्यायला त्रास होणे.
• डोळे लाल होणे.
• घसा दुखणे.
• खोकला.
• नाक वाहणे.
• डोके दुखणे.
• थकवा.
• अंगदुखी.