विरार : विधानसभा निवडणुकीच्या मतदानाला अवघे काही तास शिल्लक आहेत. या अगोदर आज सकाळपासून अनेक मोठ्या राजकीय घडामोडी घडताना दिसत आहेत. आज सकाळी भाजपचे केंद्रीय महासचिव विनोद तावडे हे हॉटेल विवांतमध्ये पैसे वाटत असल्याची माहिती समजल्यानंतर बहुजन विकास आघाडीच्या कार्यकर्त्यांमध्ये आणि भाजपच्या कार्यकर्त्यांमध्ये मोठा राडा झाला.

आप्पा ठाकूरांना मोठा धक्का
हे प्रकरण ताजे असताना आप्पा ठाकूरांना पालघरमध्ये मोठा दणका बसला आहे. बहुजन विकास आघाडीचे डहाणूचे उमेदवार सुरेश पाडवी यांनी भाजपमध्ये प्रवेश केला आहे. पालघरचे भाजप जिल्हाध्यक्ष भरत राजपूत यांच्या उपस्थितीत पाडवी यांनी पक्ष प्रवेश केला आहे. काहीच दिवसंपूर्वी पाडवी यांनी भाजप मधून बहुजन विकास आघाडीत प्रवेश करत उमेदवारी मिळवली होती .

विशेष म्हणजे त्यांनी भाजपात प्रवेश करत भाजपाचे उमेदवार विनोद मेढा यांना पाठिंबा जाहीर केला आहे. यामुळे सगळी राजकीय समीकरणं बदललली आहेत. सुरेश पाडवी यांनी भाजपचे पालघर जिल्हाध्यक्ष भरत राजपूत यांच्याशी चर्चा करून अधिकृतरित्या पक्षप्रवेश केला आहे.