Parth Pawar : पुण्यात राष्ट्रवादी काँग्रेसचे खासदार पार्थ पवार यांनी जिजाई बंगल्यावर पक्षातील काही निवडक आमदारांची बैठक बोलावली आहे. या बैठकीला मोजक्याच आमदारांना निमंत्रित करण्यात आल्याची माहिती समोर आली आहे. त्यामुळे राष्ट्रवादी काँग्रेसमध्ये नेमकं काय सुरू आहे, याबाबत राजकीय वर्तुळात चर्चांना उधाण आलं आहे.

एकीकडे राष्ट्रवादी काँग्रेसच्या दोन्ही गटांच्या विलिनीकरणाची चर्चा सुरू असताना पार्थ पवार यांनी तातडीने बोलावलेल्या या बैठकीला विशेष महत्त्व प्राप्त झालं आहे. ही बैठक नेमकी कोणत्या कारणासाठी बोलावण्यात आली आणि ठराविक आमदारांनाच का निमंत्रित करण्यात आलं, याबाबत राजकीय वर्तुळात विविध तर्कवितर्क लढवले जात आहेत.

सूत्रांनी दिलेल्या माहितीनुसार, विलिनीकरणाच्या मुद्द्यावर पार्थ पवार आमदारांची मतं जाणून घेत असल्याचं समजतं. ठाकरे गटाचे खासदार संजय राऊत यांनी राष्ट्रवादीचे २० ते २२ आमदार फुटणार असल्याचा दावा केला होता. त्यानंतर पार्थ पवार यांनी आमदारांची बैठक बोलावल्याने या घडामोडींना अधिक महत्त्व प्राप्त झालं आहे.

दरम्यान, शरद पवार गटाकडून काही आमदारांना फोन आल्याची माहिती आहे. तसेच अजित पवार गटाकडूनही काही आमदारांशी संपर्क साधण्यात आल्याचं समजतं. शरद पवार गटातील नेमक्या कोणत्या नेत्यांचे फोन आले होते, याची माहिती पार्थ पवार आमदारांकडून जाणून घेण्याचा प्रयत्न करत असल्याची चर्चा आहे.

बैठकीला हे आमदार उपस्थित

या बैठकीला अजित पवार गटाचे मंत्री दत्तात्रय भरणे, शिरूर-हवेलीचे आमदार माऊली कटके आणि भोरचे आमदार शंकर मांडेकर उपस्थित असल्याची माहिती समोर आली आहे. आता या बैठकीत नेमकी काय चर्चा होते आणि त्यातून राष्ट्रवादीच्या विलिनीकरणाबाबत कोणता निर्णय किंवा भूमिका समोर येते, याकडे राजकीय वर्तुळाचं लक्ष लागलं आहे.

RAHUL GANDHI: ‘मोदी पंतप्रधानपदी राहू शकणार नाहीत’; चर्चेच्या आव्हानावर राहुल गांधींचं मोठं विधान