Panchayat Samiti Pune District : राज्यात स्थानिक स्वराज्य संस्थांच्या निवडणुकीचे बिगुल वाजले असून दिवाळीनतंर निवडणुका होणार असल्याचे स्पष्ट संकेत देण्यात आले आहेत. या निवडणुकीत नगरपरिषद, महापालिका, जिल्हा परिषद आणि पंचायत समितीची निवडणुका येतात. नुकतीच पुणे जिल्हा परिषदेच्या अंतर्गत येणाऱ्या १३ पंचायत समितीच्या सभापती पदाचे आरक्षण सोडत जाहीर करण्यात आली आहे. यामुळे आता उमेदवारांना निवडणुकीचे वेध लागलेले आहेत. लवकरच निवडणुकीची तारीख जाहीर करण्यात येणार असल्याची माहिती मिळत आहे. पंचायत समितीच्या निवडणुकीत दोन्ही राष्ट्रवादी दोन्ही शिवसेना या पक्षांमध्ये उभी फूट पडल्यानंतर ते या निवडणुकीला पहिल्यांदाच सामोरे जाणार आहेत. त्यामुळे ही निवडणूक स्थानिक पातळीवरील अत्यंत महत्वाची निवडणूक असणार आहे. सभापती पदाचे आरक्षण सोडत जाहीर होताच आता उमेदवारांची चाचपणी सुरू झाली आहे. या निवडणुकीत भाजपला देखील ग्रामीण भागामध्ये आपली पकड मजबूत करण्यासाठी त्या दृष्टीने प्रयत्न केले जात आहेत. या आरक्षण सोडतीमध्ये अनेक ठिकाणी महिलाराज असल्याचे दिसत आहे. पुणे जिल्ह्याचा पश्चिम भाग, उत्तर भाग आणि दक्षिण भागात राष्ट्रवादी काँग्रेसचे पक्षाचे वर्चस्व आहे. या निवडणुकीत शिवसेना देखील आपली ताकद दाखवत आहे निवडणुकीला गावकी भावकी कशा पद्धतीने सामारे जाणार हे पाहवे अत्यंत महत्वाचे असणार आहे. पंचायत समितींची आरक्षण सोडत पुढील प्रमाणे : पुणे जिल्हा परिषद अंतर्गत असणाऱ्या १३ पंचायत समित्यांच्या सभापती पदांचे आरक्षण सन २०२५ करिता सोडत कार्यक्रमानुसार निश्चित करण्यात आले आहे. आरक्षणानुसार अनुसूचित जाती, अनुसूचित जमाती, नागरिकांचा मागासवर्ग (OBC) आणि महिलांसाठी (सर्व प्रवर्गातील) सभापती पदे आरक्षित झाली आहेत. निश्चित झालेले आरक्षण खालीलप्रमाणे आहे: १ इंदापूर : अनुसूचित जाती २ जुन्नर : अनुसूचित जमाती महिला ३ दौंड : नागरिकांचा मागासवर्ग ४ पुरंदर : नागरिकांचा मागासवर्ग ५ शिरूर : नागरिकांचा मागासवर्ग महिला ६ मावळ : नागरिकांचा मागासवर्ग महिला ७ वेल्हे : सर्वसाधारण महिला ८ मुळशी : सर्वसाधारण महिला ९ भोर : सर्वसाधारण महिला १० खेड : सर्वसाधारण महिला ११ हवेली: सर्वसाधारण १२ बारामती : सर्वसाधारण १३ आंबेगाव : सर्वसाधारण इच्छूकांची मोर्चेबांधणी पंचायत समित्यांच्या आरक्षण सोडतीत जिल्ह्यातील जुन्नर, वेल्हे, मुळशी, भोर आणि खेड या पाच पंचायत समित्या महिलांसाठी आरक्षित करण्यात आलेल्या आहेत. या आरक्षणामुळे पुणे जिल्ह्यातील राजकीय गणिते बदलणार असून, सभापती पदासाठी इच्छुकांची मोर्चेबांधणी आता नव्या निश्चित आरक्षणानुसार सुरू होईल. त्यामुळे मोठी रस्सीखेच होण्याची शक्यता वर्तविण्यात आली आहे. आरक्षणानुसार महत्त्वाचे बदल: अनुसूचित जाती (SC) साठी इंदापूर पंचायत समितीचे सभापती पद आरक्षित झाले आहे. अनुसूचित जमाती महिला (ST Female) साठी जुन्नर पंचायत समितीचे सभापती पद आरक्षित झाले आहे. नागरिकांचा मागासवर्ग (OBC) प्रवर्गासाठी दौंड आणि पुरंदर या दोन पंचायत समित्यांची पदे निश्चित झाली आहेत. नागरिकांचा मागासवर्ग महिला (OBC Female) प्रवर्गासाठी शिरूर आणि मावळ या दोन पंचायत समित्यांची पदे आरक्षित झाली आहेत. सर्वसाधारण महिला (General Female) प्रवर्गासाठी सर्वाधिक म्हणजे वेल्हे, मुळशी, भोर आणि खेड या चार पंचायत समित्यांची पदे आरक्षित करण्यात आली आहेत. सर्वसाधारण (General) प्रवर्गासाठी हवेली, बारामती आणि आंबेगाव या तीन पंचायत समित्यांची पदे निश्चित झाली आहेत. हेही वाचा : “भोजपुरी गायक रितेश पांडे यांना कारगहर, प्रीती किन्नर यांना भोरेतून तिकीट…” ; बिहार निवडणुकीसाठी पीकेंच्या पक्षाची पहिली यादी
