Baramati : बारामतीत उद्योजकाच्या कारवर गोळीबार
Baramati : मिळालेल्या प्राथमिक माहितीनुसार, शुक्रवारी दुपारी कोळेकर यांना इन्स्टाग्रामच्या माध्यमातून अज्ञात व्यक्तींनी संपर्क साधून दोन लाख रुपयांची खंडणी मागितल्याचे सांगण्यात येते.

बारामती : बारामती एमआयडीसी परिसरातील शिवांभोनगर येथे उद्योजक राजन कोळेकर यांच्या डिफेंडर कारवर अज्ञात हल्लेखोरांनी दोन राउंड गोळीबार केल्याची घटना घडली. शुक्रवारी सायंकाळी सहा वाजण्याच्या सुमारास घडलेल्या या प्रकारामुळे औद्योगिक वसाहतीत खळबळ उडाली. सुदैवाने या घटनेत कोणतीही जीवितहानी झाली नाही.
मिळालेल्या प्राथमिक माहितीनुसार, शुक्रवारी दुपारी कोळेकर यांना इन्स्टाग्रामच्या माध्यमातून अज्ञात व्यक्तींनी संपर्क साधून दोन लाख रुपयांची खंडणी मागितल्याचे सांगण्यात येते. त्यानंतर काही तासांतच हल्लेखोरांनी त्यांच्या घराजवळ येऊन डिफेंडर कारवर गोळीबार केला.
घटनेची माहिती मिळताच बारामती तालुका पोलिसांनी घटनास्थळी धाव घेत पाहणी केली. हल्लेखोरांचा शोध घेण्यासाठी परिसरातील सीसीटीव्ही फुटेज आणि तांत्रिक माहितीच्या आधारे तपास सुरू करण्यात आला आहे.
खंडणीसाठीच गोळीबार?
इन्स्टाग्रामवरून खंडणीची मागणी आणि त्यानंतर झालेला गोळीबार या दोन्ही घटनांचा परस्पर संबंध आहे का, याचा तपास पोलीस करीत आहेत. हल्ल्यामागील नेमके कारण आणि हल्लेखोरांची ओळख अद्याप स्पष्ट झालेली नाही.





