Mumbai Municipality : मुंबई महापालिकेच्या महापौर आणि उपमहापौर निवडीअगोदर आज एक मोठी राजकीय घडामोड घडली आहे. ज्यामुळे मुंबईच्या राजकीय वर्तुळात खळबळ उडाली आहे. ठाकरेंच्या नेतृत्वातील शिवशक्ती आघाडीतील शरद पवारांच्या राष्ट्रवादी काँग्रेस पक्षाचा एकमेव नगरसेवक फुटला असून, या नगरसेवकाने महायुतीला पाठिंबा दिला आहे.

शरद पवार यांच्या राष्ट्रवादी काँग्रेस पक्षाचे नगरसेवक अजित रावराणे यांनी उपमुख्यमंत्री एकनाथ शिंदे यांच्यासोबत झालेल्या प्रदीर्घ चर्चेनंतर महायुतीला पाठिंबा देण्याचा निर्णय घेतला आहे. शिंदेंच्या या राजकीय खेळीने उद्धव ठाकरेंसह मित्र पक्षांना धक्का बसला आहे. मुंबई महापालिकेची निवडणूक भाजप आणि शिवसेना शिंदे पक्षाने युती करत एकत्र लढवली. अजित पवार यांचा राष्ट्रवादी काँग्रेस पक्ष या युतीमध्ये सहभागी नव्हता. अजित पवार गटाने आधीच भूमिका स्पष्ट करत महायुतीला पाठिंबा दिला.

आता शरद पवारांच्या राष्ट्रवादीचे नगरसेवक अजित रावराणे यांनी आपली भूमिका स्पष्ट करत उपमुख्यमंत्री एकनाथ शिंदे यांच्या नेतृत्वातील शिवसेनेला पाठिंबा दिला आहे. यामुळे मुंबई महापालिकेत दोन्ही राष्ट्रवादी गट आता शिंदेंच्या नेतृत्वाखालील शिवसेनेत एकत्र आले आहेत. आता शिंदेंना चार नगरसेवकांचे अतिरिक्त बळ मिळाले आहे.

भाजपचे धक्कातंत्र? 

मुंबईचा महापौर भाजपचा होणार असून, अनेक महिला नेत्यांची नावे चर्चेत आहेत. मुंबई पालिकेसाठी यंदा महापौर पद सर्वसाधारण महिलेसाठी आरक्षित झाले आहे. त्यामुळे चर्चेत असलेल्या महिला नेत्यांना संधी मिळणार की पुन्हा भाजप धक्कातंत्र अवलंबणार हे काही दिवसांत स्पष्ट होईल. दुसरीकडे शिदेंच्या शिवसेनेला उपमहापौर पद मिळणार असल्याचे सांगितले जात आहे.

मातोश्रीवर बैठक 

उद्धव ठाकरे यांच्या शिवसेनेकडे ६५ नगरसेवक असून मनसेचे नगरसेवक धरून तो आकडा ७१ पर्यंत जातो. ठाकरेंकडून देखील महापौर आणि उपमहापौर पदासाठी नगसेवक देणार असल्याची चर्चा असून, याच पार्श्वभूमीवर नुकतीच मातोश्रीवर उद्धवसेनेच्या नगरसेवकांची एक विशेष बैठक पार पडल्याची माहिती आहे.