Bhuinj Police – शाळा, महाविद्यालये, बाजारपेठ परिसरात कर्णकर्कश आवाज टाकत कित्येक तरुण दुचाकी दामटताना फिरत असल्या बाबतची तक्रार भुईज पोलीस ठाण्यामध्ये प्राप्त झाली होती. पोलिसांनी धडक मोहीम राबवत ११ बुलेट मोटरसायकली ताब्यात घेऊन वाहनांवर बसवलेले कर्णकर्कश आवाजाचे सायलेन्सर काढून त्या ठिकाणी मूळ कंपनीचे सायलेन्सर बसवले. संबंधित ११ बुलेट मोटरसायकली ताब्यात घेऊन दुचाकी वाहनचालकां विरुद्ध मोटार वाहन कायद्यान्वये कारवाई करून एकूण १४ हजार ५०० रुपयांचा दंड आकारण्यात आला. भुईंज पोलीस ठाणे हद्दीत काही दुचाकी वाहन चालकांकडून बुलेट मोटरसायकलींना कंपनीचा असलेला मूळ सायलेन्सर काढून त्या ऐवजी मोठ्या आवाजाचे सायलेन्सर बसवून शाळा, महाविद्यालये, बाजारपेठ परिसरात कर्णकर्कश आवाज टाकत कित्येक तरुण दुचाकी दामटत होते. याबाबत तक्रारीची दखल घेत कारवाई करण्यात आली. ही कारवाई भुईंज पोलीस ठाण्याचे सहाय्यक पोलीस निरीक्षक पृथ्वीराज ताटे, पोलीस उपनिरीक्षक पतंगराव पाटील, पोलीस उपनिरीक्षक सुरज शिंदे, तसेच वाहतूक शाखेचे पोलीस अंमलदार सुशांत धुमाळ, पोलीस कॉन्स्टेबल रोहन चव्हाण, आणि पोलीस कॉन्स्टेबल अजित पवार यांनी केली. बेकायदेशीर सायलेन्सर लावून ध्वनी प्रदूषण करणारी बुलेट मोटरसायकल आढळल्यास तात्काळ भुईंज पोलीस ठाण्याशी संपर्क साधावा. माहिती देणाऱ्या नागरिकांचे नाव पूर्णतः गोपनीय ठेवण्यात येईल. तसेच ही कारवाई केवळ दंडापुरती मर्यादित नसून समाजात शिस्त व जबाबदारीची जाणीव निर्माण करणारी ठरणार असल्याचे सपोनि पृथ्वीराज ताटे यांनी सांगितले.