Bhor Sub District Hospital – भोर येथील उपजिल्हा रुग्णालयाची क्षमता ५० खाटांची आहे. वाढत्या रुग्णांसाठी खाटा अपुऱ्या पडत असल्याने काही रुग्णांना उपचारासाठी पुण्याकडे धाव घ्यावी लागत होती. ही गरज लक्षात घेता भोर रुग्णालयात १०० खाटांपर्यंत वाढ करण्याची मागणी पंचायत समिती सभापती मनीषा कंक तसेच रुग्ण कल्याण समितीचे सदस्य सुरेश कडू, नितीन सोनवले आणि विलास मादगुडे यांनी आमदार शंकर मांडेकर यांच्याकडे केली आहे. याबाबत त्यांनी निवेदन दिले आहे.

सध्या रुग्णसंख्या वाढल्याने उपचार व्यवस्थेवर ताण पडत असून अनेकदा खाटांच्या कमतरतेचा सामना करावा लागतो. रुग्णालयाची क्षमता १०० खाटांपर्यंत वाढविल्यास अतिरिक्त्त तज्ज्ञ डॉक्टर, परिचारिका, आधुनिक वैद्यकीय उपकरणे, अत्याधुनिक उपचार सुविधा आणि स्वतंत्र शस्त्रक्रिया विभाग उपलब्ध होऊ शकतील. भोर तालुक्यातील नागरिकांना अधिक सक्षम आणि सर्वसमावेशक आरोग्यसेवा उपलब्ध करून देण्यासाठी शासनाने भोर उपजिल्हा रुग्णालयाच्या विस्ताराचा प्रस्ताव तातडीने मंजूर करावा, अशी मागणी निवेदनात करण्यात आली आहे.

सर्पदंश, श्वान चावा, अपघात, गर्भवती महिलांची तपासणी, ज्येष्ठ नागरिकांचे उपचार, बालरोग, दंतोपचार तसेच दिव्यांग तपासणीसाठी मोठ्या प्रमाणात रुग्ण येथे येत असतात. याशिवाय पुणे-बेंगलोर राष्ट्रीय महामार्ग, पंढरपूर मार्ग, महाड मार्ग, कापूरहोळ-भोर तसेच मांढरदेवी-वाई मार्गावर होणाऱ्या अपघातांतील जखमी रुग्णांनाही प्राथमिक उपचारासाठी भोर रुग्णालयात आणले जाते. मात्र, उपलब्ध सुविधा आणि मर्यादित खाटसंख्येमुळे अनेक रुग्णांना पुढील उपचारांसाठी जिल्हा रुग्णालय अथवा पुण्यातील मोठ्या रुग्णालयांकडे पाठवावे लागते.

चांदे (ता. मुळशी) येथे आमदार मांडेकर यांची भेट घेण्यात आली. यावेळी माजी उपसभापती सुनील भेलके, संतोष कंक आणि रुग्ण कल्याण समितीचे सदस्य उपस्थित होते. निवेदनात भोर तालुक्याच्या भौगोलिक आणि आरोग्यविषयक गरजांकडे लक्ष वेधण्यात आले आहे. भोर तालुका हा दुर्गम व डोंगराळ भाग म्हणून ओळखला जातो. तालुक्यातील अनेक गावे आणि वाड्या-वस्त्यांमधील गरीब व गरजू नागरिकांसाठी भोर उपजिल्हा रुग्णालय हेच प्रमुख आरोग्य केंद्र आहे.