Bhor News : भोर तालुक्यातील भोंगवली गावच्या (Bhor News) हद्दीत दत्त मंदिर येथे १६ वर्षीय अल्पवयीन मुलीचा बालविवाह झाल्याची धक्कादायक घटना समोर आली आहे. या प्रकरणी मुलीचे आई-वडील, मुलगा, मुलाचे आई-वडील, एका नातेवाईकासह विवाह लावून देणाऱ्या पुजाऱ्याविरुद्ध राजगड पोलीस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, भोंगवली (ता. भोर, जि. पुणे) येथील दत्त मंदिरात १२ मे २०२६ रोजी दुपारी १२ वाजण्याच्या सुमारास हा विवाह झाल्याचा आरोप आहे. संबंधित मुलगी सोनाली संतोष घाडगे (वय १६, रा. उदमाई वाडी, ता. इंदापूर, जि. पुणे) ही अल्पवयीन (Bhor News) असल्याचे माहीत असतानाही तिचा विवाह ऋषभ बबन कुरूमकर (रा. वागदरी, ता. श्रीगोंदा, जि. अहिल्यानगर) याच्यासोबत लावण्यात आल्याचे फिर्यादीत नमूद करण्यात आले आहे.

या विवाहासाठी मुलीचे वडील संतोष बबन घाडगे आणि आई रूपाली संतोष घाडगे यांनी सहभाग घेतल्याचा आरोप आहे. तसेच मुलाचे वडील बबन दौलता कुरूमकर, आई सीमा बबन कुरूमकर, निलेश शिवाजी घाडगे आणि हिंदू रितीरिवाजानुसार विवाह लावून देणारा, मात्र नाव व पत्ता अद्याप समोर न आलेला पुजारी यांच्यावरही बालविवाह घडवून आणल्याचा आरोप करण्यात आला आहे.

या प्रकरणाची माहिती मिळाल्यानंतर ग्रामपंचायत अधिकारी शैला गंगाराम आटोळे यांनी राजगड पोलीस ठाण्यात फिर्याद दिली. त्यांच्या फिर्यादीवरून सात जणांविरुद्ध गुन्हा दाखल करण्यात आला आहे.

घटना मे महिन्यात घडली असली तरी या प्रकरणाची (Bhor News) पोलीस ठाण्यात २२ ऑगस्ट २०२६ रोजी सकाळी १०.०५ वाजता नोंद करण्यात आली. अल्पवयीन मुलीचा विवाह कोणत्या परिस्थितीत आणि नेमका कोणाच्या पुढाकाराने झाला, तसेच या विवाहासाठी अन्य कोणाचा सहभाग होता का, याबाबत पोलीस तपास करीत आहेत.

या प्रकरणाचा तपास सहाय्यक पोलीस निरीक्षक राठोड करीत असून, प्रभारी अधिकारी पोलीस निरीक्षक जाधव यांच्या मार्गदर्शनाखाली पुढील तपास सुरू आहे. बालविवाहासारख्या गंभीर सामाजिक प्रथेविरुद्ध प्रशासन आणि पोलिसांकडून कायदेशीर कारवाई करण्यात येत असल्याने या प्रकरणाकडे परिसराचे लक्ष लागले आहे.