Bhoreshwar Temple : श्रावण महिन्याच्या दुसऱ्या सोमवारी भोरेश्वर मंदिरात श्रावणी सोमवार मोठ्या भक्तिभावाने आणि उत्साहात साजरा करण्यात आला. यानिमित्त दिवसभर विविध धार्मिक व सांस्कृतिक कार्यक्रमांचे आयोजन करण्यात आले होते. सकाळपासूनच दर्शनासाठी भाविकांनी मंदिरात रांग लावली होती.

पहाटे भगवान शंकराचा अभिषेक करण्यात आला. सकाळी ८ वाजल्यानंतर भाविकांसाठी प्रसादाचे आयोजन करण्यात आले. दुपारी ३ ते ५ वाजेपर्यंत बजरंग आळी येथील माऊली महिला भजनी मंडळाचा भजनाचा कार्यक्रम झाला.

सायंकाळी ५ ते ६ या वेळेत भोर तालुका सिंगर ग्रुपच्या वतीने भगवान महादेवांवरील तसेच विविध भक्तिगीतांचा कार्यक्रम सादर करण्यात आला. त्यानंतर सायंकाळी ६ ते ७ वाजेपर्यंत भेलकेवाडी येथील जय हनुमान पथकाने ढोल-लेझीमच्या पारंपरिक खेळातून मानवंदना दिली. यानंतर भगवान शंकराची आरती करण्यात आली.

यावेळी भगवान शंकराचा गाभारा आकर्षक फुलांनी सजवण्यात आला होता. त्यामुळे मंदिर परिसरात दिवसभर भक्तिमय वातावरण होते.

या संपूर्ण कार्यक्रमाचे नियोजन शिवशंभो ग्रुप, भोर यांनी केले. भोरेश्वर देवस्थान ट्रस्टचे सहकार्य लाभले. भविष्यातही विविध कार्यक्रम राबविण्याचे नियोजन शिवशंभो ग्रुपकडून करण्यात येणार असल्याचे सांगण्यात आले. तसेच प्रत्येक सोमवारी वेगवेगळ्या प्रकारची आकर्षक फुलांची मांडणी करण्याचा मानस असल्याचे ग्रुपच्या वतीने सांगण्यात आले.