Basmati Rice Rates: मध्यपूर्वेतील युद्धामुळे तांदळाची निर्यात जवळपास ठप्प झाली आहे. अगोदर बुक केलेल्या ऑर्डर वाहतूक खर्च वाढल्याने परदेशात पाठविण्यात अडचणी येत आहेत. सरकारने तांदूळ निर्यातदारांना मदत करण्याच्या शक्यतेवर विचार करावा असे तांदूळ निर्यातदारांच्या संघाने म्हटले आहे. निर्यातीवर इतका परिणाम झाला आहे की, बासमती तांदूळ निर्यात होणार नसल्यामुळे या तांदळाचे दर गेल्या 72 तासात दहा टक्क्यांनी कोसळले आहेत. या बाबीकडे लक्ष वेधण्यात आले. या संघटनेने कृषी निर्यात विकास प्राधिकरणाकडे निवेदन सादर केले आहे. जहाजाचे कंटेनर मिळत नाहीत. जहाजे अचानक रद्द होत आहेत. त्यामुळे बंदरावर असलेल्या तांदळावर परिणाम होत आहे. जागतिक मालवाहतुकीचा दर या आठवड्यात 20 टक्क्यांनी वाढला आहे. जहाजाच्या इंधनाचे दर एक आठवड्यापूर्वी 520 डॉलर प्रति टन होते. ते आता 580 डॉलर प्रति टन झाले आहे. त्यामुळे एकूणच वाहतुकीचा खर्च वाढला आहे. एकीकडे निर्यात ठप्प झाली आहे तर देशांतर्गत उपलब्धता वाढल्यामुळे तांदळाचे दर घसरले आहेत. अशा परिस्थितीत निर्यातदारासमोर खेळत्या भांडवलाचा प्रश्न निर्माण झाला आहे. हा प्रश्न शक्य तितक्या लवकर सोडविण्याचा प्रयत्न करावा, नसता अनेक निर्यातदारांसमोर दिवाळखोरीचे प्रश्न निर्माण होण्याची भीती निर्माण झाली आहे. बंदरावर हाताळणी शुल्क आणि स्टोरेज शुल्क जर केंद्र सरकारने रद्द केले किंवा कमी केले तर निर्यातदारांना थोडीफार मदत होऊ शकेल असे सांगण्यात आले. युद्धामुळे परत आलेल्या जहाजातील मालाची नुकसान भरपाई कशी देता येईल यावरही विचार करण्याची गरज असल्याचे निर्यात दारांच्या संघटनेने नमूद केली. कॉन्ट्रॅक्ट रद्द झाल्यामुळे होणारा खर्च कमी करण्यासाठी सरकार मदत करू शकते. त्याचबरोबर सध्याच्या परिस्थितीत निर्यातदारांना खेळते भांडवल उपलब्ध करण्यासाठी बँकांच्या माध्यमातून मदत केली जाऊ शकते असे सांगण्यात आले.
