Baramati Loksabha Election 2024 – माजी मंत्री विजय शिवतारे यांनी आज बारामतीत दौरा केला. बारामती तालुक्यातील कन्हेरी येथील मंदिरात त्यांनी दर्शन घेतले. यावेळी माध्यमांशी संवाद साधताना शिवतारे म्हणाले की, चार वेळा मुख्यमंत्रीपद, पाच वेळा उपमुख्यमंत्री पद बारामतीकरांकडं होतं तरीसुद्धा या मतदार संघातील पाण्याचा प्रश्न ते सोडवू शकले नाहीत. बारामतीत 60 कोटी रुपयांचे एसटी स्टँड उभारले जाते, मात्र मतदारसंघातील पाण्याचा प्रश्न का सुटला जात नाही? असा सवाल उपस्थित करत शिवतारेंनी पवारांवर निशाणा साधला.

लोकसभा व विधानसभा निवडणुकीच्या प्रचाराची सुरुवात पवारांकडून बारामती तालुक्यातील कन्हेरी येथील मंदिरात नारळ फोडून केली जाते. याच मंदिरात बारामती लोकसभा मतदारसंघासाठी अपक्ष उमेदवार म्हणून विजय शिवतारे यांनी आज आपली उमेदवारी जाहीर केली आहे. त्या पार्श्वभूमीवर त्यांनी या मंदिरात नारळ फोडून प्रचाराला सुरुवात केली असल्याचे सांगितले.

शिवतारे म्हणाले की, पवारांनी एवढ्या वर्षात साडेचार लाख नागरिकांच्या पाण्याचा प्रश्न सोडवला नाही. मात्र एसटी स्टँड उभारण्यासाठी 60 कोटी रुपये खर्च केले. असाच अनन्वित अन्याय बारामती लोकसभा मतदार संघातील इंदापूर, खडकवासला, पुरंदर, भोर, दौंड तालुक्यावर झाला आहे. आम्ही किती दिवस यांना मतं देत राहायचं? त्यामुळे जनतेने आता विचार करायला हवा. एक पर्याय म्हणून मी येथे उभारतोय, असे शिवतारे म्हणाले.

मला जर लोकांनी संधी दिली तर बारामतीच्या पश्चिम पट्ट्यात सोनं केल्याशिवाय राहणार नाहीत. गेली पन्नास वर्षात पवार साहेब व अजित पवार यांनी मुख्यमंत्री असताना, मंत्री असताना जे केले नाही ते पुढच्या पाच वर्षात मार्गी लागेल असेही शिवतारे म्हणाले.

शिवतारे यांनी मंदिरात प्रचाराचा नारळ फोडला. घटक पक्ष म्हणून एनडीएचा घटक पक्ष म्हणून फोडला की, अपक्ष उमेदवार म्हणून? असा प्रश्न केला असता शिवतारे म्हणाले की, सामान्य जनतेचा प्रतिनिधी म्हणून मी आज प्रचाराचा नारळ फोडला. उद्याचं काय सांगता येत नाही. कदाचित मी एनडीएचाही उमेदवार असू शकेल. ही जनतेची लढाई आहे. मी लढणार. मी माझ्या व भारतीय जनता पक्षाच्या नेत्यांना कन्व्हेन्स करण्याचा प्रयत्न करेन. तुमचं जे इप्सित आहे. ते अजित पवार एकटे लढून होणार नाहीत. इप्सित साध्य करायचे असेल तर मी उपयोगी पडेल. नरेंद्र मोदी विचार मंच किंवा नमो विचार मंचाच्या नावाने प्रचार करणार आहे. मी महायुतीच्या किंवा भाजपच्या विरोधात नाही, असेही शिवतारे यांनी स्पष्ट केले.