Bangladesh | India – अगोदर पाकिस्तानच्या आयएसआय या कुख्यात गुप्तचर संस्थेच्या अधिकाऱ्यांचा दौरा आयोजित केल्यानंतर आता बांगलादेशने भारतीय सीमेजवळ तुर्की ड्रोन तैनात केले आहेत. बांगलादेशने तुर्कीकडून टीबी- २ ड्रोन खरेदी केले आहेत आणि भारत-बांगलादेश सीमेजवळ देखरेखीसाठी त्यांचा वापर करत आहे. शेख हसीना यांना सत्तेवरून काढून टाकल्यानंतर, मोहम्मद युनूस यांच्या अंतरिम सरकारने मुस्लिम देशांशी जवळीक साधण्यास सुरुवात केली आहे. बांगलादेश सरकार पाकिस्तानी सैन्य आणि सरकारशी जवळीक वाढवत आहे आणि आता तुर्कीशीही संबंध सुधारत आहेत. वृत्तसंस्था एएनआयने संरक्षण सूत्रांच्या हवाल्याने म्हटले आहे की, सीमेजवळील बांगलादेशी भागात ड्रोन उडताना दिसले आहेत, ज्यामुळे भारताची चिंता वाढली आहे. पाकिस्ताननेही तुर्कीकडून हे ड्रोन खरेदी केले आहेत. सूत्रांनी सांगितले की, बांगलादेश एक पाळत ठेवण्याची मोहीम राबवत आहे ज्या अंतर्गत ड्रोन वापरून सीमेवर लक्ष ठेवले जात आहे. अनेक प्रसंगी, हे ड्रोन २० तासांपर्यंत उडताना दिसले आहेत. बांगलादेशच्या प्रत्येक हालचालीवर लक्ष ठेवण्यासाठी, भारतीय लष्कराने अशा उपकरणांवर लक्ष ठेवण्यासाठी रडार बसवले आहेत. टीबी-२ बेरक्तार मध्यम उंचीवर दीर्घकाळ उड्डाण करण्यास सक्षम आहे. तुर्कीच्या संरक्षण उद्योगातील ही सर्वात मोठी कामगिरी आहे. हे एक मानवरहित विमान आहे, जे हवेतून जमिनीवर मारा करणाऱ्या शस्त्रांसह उड्डाण करण्यास देखील सक्षम आहे. जागतिक संघर्षांमध्येही याचा मोठ्या प्रमाणात वापर केला गेला आहे. गेल्या काही महिन्यांत, मोहम्मद युनूस सरकार पाकिस्तानी सैन्य, सरकार आणि गुप्तचर संस्थांशी आपले संबंध वाढवताना दिसून येत आहे. बांगलादेशने चिकन नेकसारख्या संवेदनशील भागांना भेट देण्यासाठी पाकिस्तानी लष्करी अधिकाऱ्यांची व्यवस्थाही केली आहे.
