Newasa News : भेंडा येथे पाण्याच्या पाटात बुडून बँड वादक गायकाचा मृत्यू झाल्याची धक्कादायक घटना घडली असून परिसरात हळहळ व्यक्त होत आहे. मृत व्यक्तीचे नाव स्वप्नील लक्ष्मण मगरे (वय ३२, रा. पाथरवाला बुद्रुक, ता. अंबड, जि. जालना) असे आहे. याबाबत मिळालेल्या माहितीनुसार, स्वप्नील मगरे हे मनमाड येथील कार्यक्रम आटोपून सहकाऱ्यांसोबत परत येत होते. प्रवासादरम्यान ते भेंडा कारखाना परिसरातील पेट्रोल पंपावर विश्रांतीसाठी थांबले होते. बुधवारी सकाळी सुमारे ८.३० वाजता त्यांना पुढील कार्यक्रमासाठी मढी येथे जायचे होते. त्याआधी आंघोळीसाठी ते पेट्रोल पंपामागील पाटात गेले असता ही दुर्दैवी घटना घडली. दुपारी सुमारे दीड वाजण्याच्या सुमारास त्यांचा मृतदेह पाण्यात तरंगताना आढळून आला. घटनेची माहिती मिळताच पोलिसांनी घटनास्थळी धाव घेतली. दरम्यान, नातेवाईकांनी स्वप्नील मगरे हे चांगले पोहणारे असल्याचे सांगत त्यांच्या मृत्यूबाबत संशय व्यक्त केला आहे. त्यामुळे हा अपघाती मृत्यू की घातपात, याबाबत प्रश्न उपस्थित झाले आहेत. शवविच्छेदन अहवालानंतरच मृत्यूचे नेमके कारण स्पष्ट होणार आहे. सदर मृतदेह पुढील तपासासाठी छत्रपती संभाजीनगर येथे पाठविण्यात येणार असल्याची माहिती सूत्रांनी दिली आहे.
