Pune News : पंजाबमधील लुधियाना येथे राहणाऱ्या १७ वर्षीय अल्पवयीन मुलीला प्रेम व विवाहाचे आमिष दाखवून पुण्यात आणल्याप्रकरणी फुरसुंगी पोलिसांनी एका २१ वर्षीय तरुणाविरुद्ध पोक्सो कायदा आणि महाराष्ट्र धर्मस्वातंत्र्य अधिनियम, २०२६ अंतर्गत गुन्हा दाखल केला आहे. मुलीवर धर्मांतरासाठी दबाव टाकल्याचाही आरोप करण्यात आला आहे. (Pune News)

या प्रकरणी मोहम्मद रईस मोहम्मद रफीक शेख (वय २१, मूळ रा. फिरोजपूर, मलीहाबाद, लखनौ, उत्तर प्रदेश) याच्याविरुद्ध गुन्हा दाखल करण्यात आला आहे. अल्पवयीन मुलीच्या वडिलांनी फुरसुंगी पोलीस ठाण्यात फिर्याद दिली आहे. (Pune News)

पोलिसांनी दिलेल्या माहितीनुसार, फिर्यादी कुटुंब गेली १६ वर्षे पंजाबमधील लुधियाना येथे वास्तव्यास असून मुलगी तेथील शाळेत शिक्षण घेत होती. १४ ऑगस्ट २०२५ रोजी शाळेत जात असल्याचे सांगून ती घरातून बाहेर पडली; मात्र परतली नाही. त्यानंतर सराभानगर पोलीस ठाण्यात बेपत्ता झाल्याची तक्रार दाखल करण्यात आली होती. (Pune News)

दरम्यान, ३० जुलै २०२६ रोजी मुलीने आईशी मोबाइलवर संपर्क साधून ती आरोपीसोबत पुण्यातील हांडेवाडी परिसरात राहत असल्याची माहिती दिली आणि स्वतःचे लोकेशनही पाठविले. त्यानंतर मुलीचे वडील आणि काका ४ ऑगस्ट रोजी फुरसुंगी पोलीस ठाण्यात आले. पोलिसांनी कारवाई करून मुलगी आणि आरोपीला ताब्यात घेतले. (Pune News)

तपासात आरोपीने मुलीला शिक्षण पूर्ण करून देण्याचे व विवाहाचे आमिष दाखवून पुण्यात आणल्याचे समोर आले. तसेच तिच्या इच्छेविरुद्ध शारीरिक संबंध ठेवून विवाहासाठी धर्मांतर करण्याचा दबाव टाकल्याचा आरोप आहे. (Pune News)

पंजाबमधून निघाल्यानंतर आरोपीने मुलीला अलीगड आणि कर्नाटकातील कोलार येथे नेले होते. गेल्या दोन महिन्यांपासून दोघे हांडेवाडी परिसरात राहत होते, अशी माहिती फुरसुंगी पोलीस ठाण्याचे वरिष्ठ पोलीस निरीक्षक अमोल मोरे यांनी दिली. (Pune News)

मुलीची वैद्यकीय तपासणी करण्यात आली असून तिला बाल न्यायालयाच्या आदेशानुसार निरीक्षणगृहात ठेवण्यात आले आहे. पुढील कायदेशीर प्रक्रिया पूर्ण झाल्यानंतर तिला पालकांच्या ताब्यात देण्यात येणार असल्याचे पोलिसांनी सांगितले. (Pune News)

दरम्यान, महाराष्ट्र धर्मस्वातंत्र्य अधिनियम, २०२६ अंतर्गत पुण्यात आतापर्यंत दोन गुन्हे दाखल झाले आहेत. पहिला गुन्हा ५ ऑगस्ट रोजी फुरसुंगी पोलीस ठाण्यात, तर दुसरा ९ ऑगस्ट रोजी खडक पोलीस ठाण्यात नोंदविण्यात आला आहे. (Pune News)

फुरसुंगीतील प्रकरणात अल्पवयीन मुलीवर धर्मांतरासाठी दबाव आणल्याचा आरोप असून, खडक पोलीस ठाण्यात धर्मप्रसाराच्या आरोपावरून एका धर्मगुरूविरुद्ध गुन्हा दाखल करण्यात आल्याची माहिती पोलीस उपायुक्त डॉ. प्रशांत अमृतकर यांनी दिली. (Pune News)