Baba Siddique murder case: माजी राज्यमंत्री आणि राष्ट्रवादी काँग्रेसचे नेते बाबा सिद्दीकी यांच्या २०२४ मधील हत्या प्रकरणाला आता न्यायालयीन लढाईत वेग आला आहे. मुंबईतील विशेष न्यायालयाने मंगळवारी या प्रकरणातील २७ आरोपींविरुद्ध महाराष्ट्र संघटित गुन्हेगारी नियंत्रण कायदा (मकोका) आणि भारतीय न्याय संहितेच्या (BNS) विविध कलमांतर्गत आरोप निश्चित केले. न्यायालयाची कारवाई विशेष न्यायाधीश सत्यनारायण आर. नवंदर यांनी आरोपींविरुद्ध खुनाचा कट रचणे, शस्त्र कायदा आणि महाराष्ट्र पोलीस कायद्याच्या कलमांतर्गत आरोप निश्चित केले आहेत. न्यायालयाने आरोप वाचून दाखवल्यानंतर सर्व २७ आरोपींनी गुन्ह्याची कबुली नाकारली असून, आता या प्रकरणाचा रीतसर खटला सुरू होणार आहे. काय आहे प्रकरण? ६६ वर्षीय बाबा सिद्दीकी यांची १२ ऑक्टोबर २०२४ रोजी वांद्रे (पूर्व) येथील त्यांच्या मुलाच्या झीशान सिद्दीकी यांच्या कार्यालयाबाहेर गोळ्या झाडून हत्या करण्यात आली होती. या खळबळजनक हत्याकांडात पोलिसांनी आतापर्यंत २७ जणांना अटक केली असून त्यांच्यावर आरोपपत्र दाखल केले आहे. बिष्णोई गँगचा सहभाग – पोलीस तपासात या हत्येमागे कुख्यात बिष्णोई टोळीचा हात असल्याचे समोर आले आहे. तुरुंगात असलेला गुंड लॉरेन्स बिष्णोई याचा भाऊ अनमोल बिष्णोई याला या प्रकरणात मुख्य सूत्रधार आणि ‘पाहिजे असलेला आरोपी’ म्हणून घोषित करण्यात आले आहे. गुन्हेगारी जगतात स्वतःचे वर्चस्व आणि दहशत निर्माण करण्यासाठी अनमोलनेच सिद्दीकींच्या हत्येचा कट रचल्याचा दावा फिर्यादी पक्षाने केला आहे.
