Baba Siddique Murder Case। राष्ट्रवादी काँग्रेसचे नेते बाबा सिद्दीकी यांची 12 ऑक्टोबर 2024 रोजी हत्या झाली होती. मुंबईच्या वांद्रे परिसरात कलानगर येथील कार्यालयाबाहेर लॉरेन्स बिश्नोई टोळीच्या गुंडांनी हे कृत्य केले होते. दरम्यान, या प्रकरणात मुंबई पोलिसांनी तपास करुन न्यायालयात आरोपपत्र दाखल केले आहे. मात्र, या आरोपपत्रात आपण पोलिसांना दिलेल्या माहितीचा कोणताही उल्लेख नाही, त्या अनुषंगाने मुंबई पोलिसांनी कोणताही तपास केला नसल्याचा मोठा दावा बाबा सिद्दीकी यांचे पुत्र झिशान सिद्दीकी यांनी केल्याचे सांगण्यात येत आहे.

झिशान सिद्दीकी यांनी बाबा सिद्दीकी यांच्या तपासात हलगर्जीपणा होत असल्याचा आरोप देखील केला आहे. तसेच हे वक्तव्य करताना बाबा सिद्गिकी यांच्याकडील एका डायरीचा उल्लेख करत या डायरीत शेवटचे नाव भाजपचे नेते मोहित कंबोज यांचे असल्याचे सांगितले जाते. या प्रकरणात मोहित कंबोज यांचे नाव आल्याने आता भाजपची कोंडी होण्याची शक्यता वर्तवण्यात येत आहे.

मोहित कंबोज यांच्यासोबत व्हॉटसॲपवर चॅटिंग Baba Siddique Murder Case। 

झिशान सिद्दीकी यांनी केलेल्या दाव्यानुसार, ते आणि त्यांचे वडील वांद्रे परिसरातील अनेक झोपडपट्टी पुनर्वसन प्रकल्पांच्या कामासाठी उभे राहायचे. हे काम करताना त्यांचा काही बड्या बिल्डर्ससोबत वाद झाला होता. बाबा सिद्दीकी यांना रोज डायरी लिहण्याची सवय होती. या डायरीत त्यांनी या सगळ्या बिल्डर्सची नावे लिहून ठेवली आहेत. मात्र, 12 ऑक्टोबरला जेव्हा बाबा सिद्दीकी यांची हत्या झाली त्यादिवशी आपल्या वडिलांनी डायरीत एक शेवटचे नाव लिहले होते. हे नाव म्हणजे मोहित कंबोज. यानंतर माझ्या वडिलांनी मोहित कंबोज यांच्यासोबत व्हॉटसॲपवर चॅटिंगही केले होते. संध्याकाळी साडेपाच ते सहा वाजण्याच्या सुमारास या दोघांमध्ये संवाद झाला होता. पण माझ्या वडिलांनी डायरीत मोहित कंबोज यांचे नाव का लिहले, हे मी सांगू शकत नाही. त्यामुळे या गोष्टीचा तपास होणे गरजेचे आहे, असा जबाब झिशान सिद्दीकी यांनी पोलिसांना दिल्याचे  सांगण्यात येत आहे.

पोलिसांनी झिशान यांच्या जबाबानुसार प्राथमिक तपास केला. मात्र, त्यामध्ये काहीही तथ्य आढळून न आल्याने पोलिसांनी बाबा सिद्दीकी यांच्या हत्येसाठी सर्वस्वी लॉरेन्स बिश्नोई टोळीच्या सदस्यांना जबाबदार धरल्याची माहिती सूत्रांकडून देण्यात आली.

बाबा सिद्दीकींच्या डायरीत अदानींसह 7 बड्या बिल्डर्सचा उल्लेख Baba Siddique Murder Case। 
झिशान सिद्दीकी यांनी पोलिसांना दिलेल्या जबाबात सातत्याने बाबा सिद्दीकी यांच्या डायरीचा उल्लेख केला आहे. त्यानुसार वांद्रेतील पुर्नविकास प्रकल्पात नागरिकांची बाजू घेतल्यामुळे बाबा सिद्गीकी यांचा बड्या बिल्डर लॉबीशी वाद झाला होता. बाबा सिद्दीकी यांच्या डायरीत बिल्डर पृथ्वी चव्हाण, शाहिद बलवा, शिवालिक व्हेंचर्स, अदानी, नबील पटेल, विनोद गोएंका आणि ओंकार बिल्डर्स यांचा उल्लेख आहे. त्यामुळे आता या सगळ्या बिल्डर्सचा बाबा सिद्दीकी यांच्या हत्येशी काही संबंध आहे का, या अनुषंगाने तपास करण्यात येत आहे.

झिशान सिद्दीकी यांनी पोलिसांना दिलेल्या जबाबात ठाकरे गटाचे नेते अनिल परब यांनी ज्ञानेश्वर नगर प्रकल्पबाधितांची बैठक घेतल्याचाही उल्लेख आहे. त्या बैठकीत विकासकांनी झोपडपट्टीधारकांना त्याच ठिकाणी घर मिळेल असे वचन दिले होते, पण त्यानंतर ते तसं कऱणार नसल्याचे लक्षात आल्याचे झिशान यांनी पोलिसांना सांगितल्याची माहिती सूत्रांनी दिली आहे.