Akola Crime News : अकोला शहरात मोठी खळबळ उडाली असून बिश्नोई गँगकडून भाजपच्या बड्या नेत्याला खंडणीची धमकी दिल्याची माहिती समोर आली आहे. सिग्नल ॲपद्वारे आलेल्या संदेशातून अकोट मतदारसंघाचे भाजप आमदार प्रकाश भारसाकळे यांच्याकडून २ कोटी रुपये वसूल करून द्यावेत, अन्यथा गंभीर परिणाम भोगावे लागतील, अशी धमकी देण्यात आल्याचे सांगितले जात आहे. ही धमकी बिश्नोई गँगशी संबंधित शुभम लोणकर याने दिल्याची माहिती सूत्रांकडून मिळत आहे. घटनेची माहिती मिळताच अकोला (Akola) पोलिसांनी तपास सुरू केला असून संबंधित पदाधिकाऱ्याला बंदूकधारी पोलिस सुरक्षा देण्यात आल्याचे समजते. स्थानिक गुन्हे शाखेचे पथक अकोट परिसरात तैनात आहे. कोण आहे शुभम लोणकर? या आधी राष्ट्रवादीचे नेते बाबा सिद्दिकी यांच्या हत्येची आणि आता रोहीत शेट्टीच्या घराबाहेर झालेल्या गोळीबाराची जबाबदारी स्वीकारणारा शुभम लोणकर आहे. शुभम लोणकर हा मूळ अकोला जिल्ह्यातील अकोट तालुक्यातील नेव्होरी गावाचा रहिवासी आहे. या आधीही शुभम लोणकर याच्यावर अकोला पोलिसांनी कारवाई करत तब्बल 3 पिस्टलसह काही जिवंत काडतूस जप्त केल्या होत्या. लॉरेन्स बिश्नोई आणि त्याचा लहान भाऊ अनमोल बिश्नोई यांच्या संपर्कात असणाऱ्या शुभम लोणकरला बंदुकीच्या तस्करी प्रकरणात अकोला पोलिसांनी गजाआड केले होते.
