Australia vs West Indies 2nd T20 : ऑस्ट्रेलिया क्रिकेट संघाने दुसऱ्या T-20 सामन्यात वेस्ट इंडिज क्रिकेट संघाचा 34 धावांनी पराभव केला आहे. यासह तीन सामन्यांच्या कांगारूंनी मालिकेत 2-0 अशी अभेद्य आघाडी घेतली आहे.

ॲडलेड ओव्हल येथे खेळल्या गेलेल्या सामन्यात, यजमान संघाने प्रथम फलंदाजी करताना ग्लेन मॅक्सवेलच्या शतकी खेळीच्या जोरावर 20 षटकात 4 बाद 241 धावा केल्या होत्या.  प्रत्युत्तरात कॅरेबियन संघ निर्धारित षटकात 9 बाद 207 धावसंख्येपर्यतच मजल मारू शकला. ऑस्ट्रेलियाच्या ग्लेन मॅक्सवेलला सामनावीर म्हणून निवडण्यात आले. मालिकेतील शेवटचा सामना 13 फेब्रुवारीला होणार आहे.

वेस्ट इंडिजकडून रोव्हमन पॉवेलने सर्वाधिक धावा केल्या. रोव्हमन पॉवेलने 36 चेंडूत 63 धावा केल्या. त्याने आपल्या खेळीत 5 चौकार आणि 4 षटकार मारले. आंद्रे रसेलने 16 चेंडूत 37 धावांचे योगदान दिले. ऑस्ट्रेलियाकडून मार्कस स्टॉइनिसने सर्वाधिक 3 बळी घेतले. जोश हेझलवूड आणि स्पेन्सर जॉन्सन यांना 2-2 यश मिळाले. जेस बेहरेन्डॉफ आणि ॲडम झाम्पाने 1-1 विकेट घेतली.

तत्पूर्वी, ऑस्ट्रेलिया आणि वेस्ट इंडिज यांच्यात ॲडलेडमध्ये खेळल्या गेलेल्या दुसऱ्या टी-20मध्ये ग्लेन मॅक्सवेलने स्फोटक खेळी केली आहे. त्याने 55 चेंडूत नाबाद 120 धावा केल्या. यामुळे ऑस्ट्रेलियाने 20 षटकांत 4 गडी गमावून 241 धावा केल्या. मॅक्सवेलचे टी20 आंतरराष्ट्रीय कारकिर्दीतील हे पाचवे शतक होते. या बाबतीत त्याने रोहित शर्माची बरोबरी केली. रोहितने पाच टी-20 आंतरराष्ट्रीय शतकेही झळकावली आहेत.

मॅक्सवेलने अवघ्या 50 चेंडूत आपले शतक पूर्ण केले. एकवेळ ऑस्ट्रेलियन संघाने 64 धावांत तीन विकेट गमावल्या होत्या. यानंतर मॅक्सवेलने स्टॉइनिससोबत 82 धावांची भागीदारी केली. स्टॉइनिस 15 चेंडूत 16 धावा करून बाद झाला. दरम्यान, मॅक्सवेलने दुसऱ्या टोकाकडून चौकार आणि षटकार मारणे सुरूच ठेवले आणि त्यानंतर टीम डेव्हिडसोबत पाचव्या विकेटसाठी 95 धावांची नाबाद भागीदारी केली. त्याने अवघ्या 39 चेंडूत ही भागीदारी केली.

मॅक्सवेलने 55 चेंडूंत 12 चौकार आणि आठ षटकारांच्या मदतीने 120 धावा केल्यानंतर नाबाद राहिला. या काळात त्याचा स्ट्राइक रेट 241.67 होता. तर टीम डेव्हिडने 14 चेंडूंत 2 चौकार आणि 2 षटकारांच्या मदतीने 31 धावा करून नाबाद राहिला. त्याचा स्ट्राइक रेट 221.43 होता.

#FIHProLeague24 : एफआयएच स्पर्धेत भारतीय हाॅकी संघाची विजयी सुरुवात…

मॅक्सवेल जबरदस्त फॉर्मात…

मॅक्सवेल काही काळापासून उत्कृष्ट फॉर्ममध्ये आहे. त्याने चार महिन्यांत दोन टी-20 शतके झळकावली आहेत. गेल्या वर्षी नोव्हेंबरमध्ये भारताविरुद्धच्या टी-20 मालिकेदरम्यान मॅक्सवेलने शेवटचे टी-20 शतक झळकावले होते. त्याआधी, त्याने एकदिवसीय विश्वचषकादरम्यान अफगाणिस्तानविरुद्धच्या सामन्यात द्विशतक झळकावले होते आणि एकट्याने आपल्या संघाला विजय मिळवून दिला होता. आगामी T20 विश्वचषक पाहता ऑस्ट्रेलियासाठी मॅक्सवेल महत्त्वाचा ठरू शकतो. यंदा टी-20 विश्वचषक जूनमध्ये खेळवला जाणार आहे.