Bye Run Controversy : मैदानात अंपायर्सशी भिडले वेस्ट इंडिजचे खेळाडू! २० व्या षटकातील ‘त्या’ एका धावेवरून इंदूरमध्ये मोठा राडा
Bye Run Controversy : इंदूरमध्ये वेस्ट इंडिजविरुद्धच्या तिसऱ्या टी२० सामन्यात भारतीय संघ २२३ धावांवर सर्वबाद झाला. अभिषेक शर्मा आणि इशान किशन यांच्यातील १०८ धावांच्या भागीदारीनंतर मधली फळी अपयशी ठरली.
Bye Run Controversy 20th Over IND vs WI 3rd T20 Holkar Stadium India 223 : भारत आणि वेस्ट इंडिज दरम्यान होळकर स्टेडियमवर खेळल्या जात असलेल्या तिसऱ्या टी-२० सामन्यात भारतीय संघाचा डाव अनपेक्षितपणे घसरला. नाणेफेक गमावून प्रथम फलंदाजी करणाऱ्या भारतीय संघाने २० षटकांत सर्वबाद २२३ धावा केल्या. एका क्षणी भारताची धावसंख्या ८.२ षटकांत १ बाद ११५ अशी भक्कम होती आणि संघ सहज २५० धावांचा टप्पा ओलांडेल असे वाटत होते. मात्र, अवघ्या १२ चेंडूंच्या अंतरात ३ प्रमुख फलंदाज बाद झाल्याने भारताला फटका बसला. यानंतरही विडींजचे खेळाडू पंचाशी वाद घालताना दिसले.
अभिषेक-इशानची १०८ धावांची वादळी भागीदारी; पण १२ चेंडूंत सामना फिरला!
संजू सॅमसन (३) स्वस्तात बाद झाल्यानंतर अभिषेक शर्मा आणि इशान किशनने मैदानात चौफेर फटकेबाजी केली. अभिषेकने ३० चेंडूंत ५ षटकार आणि ६ चौकारांसह ६९ धावा कुटल्या, तर इशानने १८ चेंडूंत ३७ धावा केल्या. दोघांनी दुसऱ्या विकेटसाठी अवघ्या ४० चेंडूंत १०८ धावांची भागीदारी रचली. मात्र, ११५ धावांवर इशान बाद होताच पुढच्या १२ चेंडूंत अभिषेक आणि कर्णधार श्रेयस अय्यरही माघारी परतले. या पडझडीमुळे भारताला मोठी धावसंख्या उभारता आली नाही. विंडीजकडून रोस्टन चेस, शामार जोसेफ आणि शामार स्प्रिंगर यांनी प्रत्येकी २ विकेट्स टिपले.
२० व्या षटकात जोरदार वाद; बायच्या धावेवरून विंडीज खेळाडूंचा आक्षेप!
डावाच्या अखेरच्या षटकात मैदानावर मोठा हायव्होल्टेज ड्रामा पाहायला मिळाला. शामार जोसेफच्या चेंडूवर प्रिन्स यादवला फटका मारता आला नाही आणि चेंडू यष्टिरक्षक शाई होपच्या हातात गेला. होपने चेंडू गोलंदाजाकडे फेकला, मात्र जोसेफला तो पकडता आला नाही. ही संधी साधत प्रिन्स आणि मयंक यादवने धाव पूर्ण केली. चेंडू ‘डेड’ झाल्याचा दावा करत विंडीजच्या खेळाडूंनी पंच वीरेंद्र शर्मा आणि जयरामन मदनगोपाल यांच्याशी हुज्जत घातली; मात्र पंचांनी चेंडू ‘लाईव्ह’ असल्याचे सांगत भारताला बायची धाव बहाल केली.
मालिकेत २-१ अशी आघाडी घेण्याची सुवर्णसंधी!
पाच सामन्यांची ही टी-२० मालिका सध्या १-१ अशी बरोबरीत आहे. पहिल्या सामन्यात भारताने विजय मिळवला होता, तर दुसऱ्या लढतीत विंडीजने २५० धावांचा विक्रमी पाठलाग करत मालिकेत पुनरागमन केले होते. त्यामुळे इंदूरमधील हा तिसरा सामना जिंकून मालिकेत २-१ अशी आघाडी घेण्याची दोन्ही संघांना समान संधी आहे.
