ATP Perugia Challenger 2024 | सुमित नागलचे विजेतेपद हुकले, पेरुगिया चॅलेंजरच्या अंतिम फेरीत पराभूत..
ATP Perugia Challenger 2024 (Sumit Nagal) | भारताचा नंबर वन टेनिसपटू सुमित नागल रविवारी पेरुगिया चॅलेंजरच्या एकतर्फी फायनलमध्ये इटलीच्या लुसियानो डार्डेरीकडून पराभूत झाला.
26 वर्षीय नागल, जो आता जागतिक क्रमवारीत आपल्या कारकिर्दीतील सर्वोत्कृष्ट 77 व्या क्रमांकावर आहे, तो जागतिक क्रमवारीत 41 व्या क्रमांकावर असलेल्या इटालियन प्रतिस्पर्ध्याशी सामना करू शकला नाही आणि अंतिम फेरीतील सामन्यात एका तासापेक्षा कमी कालावधीत 1-6, 2-6 ने पराभूत झाला. त्यामुळे त्याला यंदाचे तिसरे विजेतेपद पटकावण्यात अपयश आले.
तत्पूर्वी, नागलने प्राथमिक फेरीत बोस्निया-हर्जेगोव्हिनाच्या बिगरमानांकित नॉर्मन फॅटिकवर विजय मिळवला होता आणि त्यानंतर उपउपांत्यपूर्व फेरीत इटलीच्या बिगरमानांकित ॲलेसँड्रो गियानेसीवर मात केली होती.त्यानंतर नागलने उपांत्य फेरीत स्पेनच्या बर्नबे जपाटा मिरालेसचा 7-6 (7-2) 1-6 6-2 असा पराभव करत अंतिम फेरीत धडक मारली होती.
दरम्यान, नागलने हेलब्रॉन चॅलेंजर विजेतेपद पटकावले होते, जी या मोसमात त्याची दुसरी चॅलेंजर ट्रॉफी होती. त्याआधी त्यानं फेब्रुवारीमध्ये चेन्नई चॅलेंजर ट्रॉफी जिंकली होती. फ्रेंच ओपन आणि हेल्ब्रॉन चॅलेंजरमधल्या सुरेख कामगिरीनंतर नागलनं जागतिक क्रमवारीत 77व्या स्थानावर झेप घेतली होती तसेच त्याच्या एकेरीच्या क्रमवारीच्या आधारे तो पॅरिस ऑलिम्पिकसाठी पात्र ठरला आहे.
