India Kabaddi Final : सुवर्णपदकापासून अवघ्या एका पावलावर! भारताचे पुरुष अन् महिला संघ अंतिम फेरीत; शनिवारी कोणाशी होणार महामुकाबला?
India Kabaddi Final : भारतीय पुरुष कबड्डी संघाने थायलंडला ६६-२८ ने पराभूत करून नवव्यांदा आशियाई क्रीडा स्पर्धा २०२६ च्या अंतिम फेरीत प्रवेश केला आहे. हा संघ आता सुवर्णपदकापासून फक्त एक विजय दूर आहे.
Asian Games 2026 Kabaddi India Men And Women Teams Enter Final : जपानमध्ये सुरू असलेल्या आशियाई क्रीडा स्पर्धा २०२६ (Asian Games 2026) मध्ये भारताच्या पुरुष आणि महिला कबड्डी संघांनी आपली निर्विवाद वर्चस्व कायम राखत अंतिम फेरीत धडक मारली आहे. शुक्रवारी, २५ सप्टेंबर रोजी तोकाई सिटीझन जिम्नॅशियममध्ये झालेल्या उपांत्य फेरीच्या सामन्यांमध्ये भारतीय खेळाडूंनी आक्रमक खेळाचे प्रदर्शन घडवले. भारतीय पुरुष संघाने थायलंडचा ६६-२८ असा धुव्वा उडवला, तर भारतीय महिला संघाने नेपाळला ४८-२४ ने नमवून दिमाखात फायनलचे तिकीट पक्के केले.
पुरुष संघाचा ऐतिहासिक नववा अंतिम सामना; थायलंडला चार वेळा ऑलआऊट!
आठ वेळचा आशियाई चॅम्पियन असलेला भारतीय पुरुष संघ आता नवव्यांदा अंतिम फेरीत दाखल झाला आहे. थायलंडविरुद्धच्या लढतीत पहिल्या हाफमध्ये भारताने ३७-१८ अशी भक्कम आघाडी घेतली होती. संपूर्ण सामन्यात भारताने प्रतिस्पर्ध्याला चार वेळा ऑलआऊट केले. रेडिंग आणि डिफेन्समध्ये अप्रतिम समन्वय राखत भारताने दुसऱ्या हाफमध्येही २९ गुणांची भर घालून सामना ६६-२८ ने जिंकला. स्पर्धेत अजेय राहिलेल्या पुरुष संघाचा सुवर्णपदकासाठी अंतिम सामना आता इराण किंवा चीनी ताइपेविरुद्ध रंगणार आहे.
INDIA KABADDI STORMS INTO FINALS!
GO FOR THE GOLD, BOYS! 🥇 pic.twitter.com/iRH9yLf4Ot https://t.co/R62W7143l5
— The Khel India (@TheKhelIndia) September 25, 2026
महिला संघाचीही एकतर्फी बाजी; नेपाळच्या आव्हानाचा उडवला पालापाचोळा!
महिलांच्या उपांत्य फेरीत भारताने सुरुवातीपासूनच सामन्यावर घट्ट पकड मिळवली. पहिल्या हाफमध्ये भारताने २३ आऊट आणि ४ बोनस गुणांसह ३१-१७ अशी भक्कम आघाडी घेतली. दुसऱ्या हाफमध्ये भारतीय बचावफळीने नेपाळच्या रेडर्सना पूर्णपणे शांत ठेवले. अखेरच्या १५ मिनिटांत नेपाळला केवळ ७ गुण मिळवता आले. भारताने हा सामना ४८-२४ अशा दुप्पट गुणांच्या फरकाने खिशात टाकत विजेतेपदाच्या लढतीत प्रवेश केला.
शनिवारी रंगणार महाअंतिम थरार; दोन्ही सुवर्णपदकांवर भारताची नजर!
𝗜𝗡𝗧𝗢 𝗧𝗛𝗘 𝗙𝗜𝗡𝗔𝗟!
India’s women’s kabaddi team stormed into the #AsianGames2026 final with a convincing 48-24 win over Japan in the semifinal. #Cheer4Bharat #TeamIndia #Kabaddi pic.twitter.com/rQ5LUma6tj
— DD India (@DDIndialive) September 25, 2026
महिला संघाचा अंतिम सामना शनिवारी इराण किंवा चीनी ताइपेविरुद्ध होणार आहे. २०२३ च्या हांगझोऊ आशियाई स्पर्धेत मिळवलेले विजेतेपद कायम राखण्यासाठी भारतीय पुरुष आणि महिला संघ सज्ज झाले आहेत. दोन्ही संघांच्या या एकतर्फी विजयांमुळे कबड्डीच्या मॅटवर भारताची दोन्ही सुवर्णपदके निश्चित मानली जात असून, संपूर्ण देशाचे लक्ष शनिवारच्या महाअंतिम सामन्यांकडे लागले आहे.
