Asian Games 2026 Kamaljeet Suruchi Win Air Pistol Gold Overcoming Fatal Accident : जपानमधील आयची प्रीफेक्चरल शूटिंग रेंजवर सुरू असलेल्या आशियाई क्रीडा स्पर्धा २०२६ (Asian Games 2026) मध्ये भारतीय नेमबाजांनी अप्रतिम कामगिरीची नोंद केली आहे. १० मीटर एअर पिस्तूल मिश्र सांघिक प्रकारात कमलजीत आणि सुरुची सिंग फोगाट या जोडीने अप्रतिम निशाणा साधत भारताच्या खात्यात दुसरे सुवर्णपदक (Gold Medal) जमा केले. अखेरच्या क्षणी एकत्र आलेल्या या जोडीने ऐतिहासिक यश मिळवले खरे; मात्र यातील २३ वर्षीय कमलजीतचा इथपर्यंतचा प्रवास अत्यंत खडतर आणि अंगावर काटा आणणारा ठरला आहे.

२०२३ चा काळरात्र ठरलेला रिक्षा अपघात; मांडीचे हाड फ्रॅक्चर!

हरियाणातील सुलखा गावचा रहिवासी असलेला कमलजीत २०२३ मध्ये सराव संपवून रिक्षामधून घरी परतत असताना भीषण अपघात झाला होता. या दुर्घटनेत त्याच्यासोबतच्या दोन प्रवाशांचा जागीच मृत्यू झाला, तर कमलजीतच्या मांडीचे हाड (फेमर) गंभीररीत्या फ्रॅक्चर झाले. पेंट फॅक्टरीमध्ये कंत्राटी कामगार असणाऱ्या वडिलांनी नातेवाईक आणि मित्रांकडून चार लाख रुपये उसने घेऊन त्याच्यावर शस्त्रक्रिया केली. तब्बल महिनाभर रुग्णालयात मृत्यूशी झुंज दिल्यानंतर त्याने पुन्हा उभं राहण्याचा निर्धार केला.

धावपटू ते भारतीय सैन्यात हवालदार; काकांनी उचलला प्रशिक्षणाचा भार!

सुरुवातीला ॲथलेटिक्समध्ये धावून लष्करात भरती होण्याचे कमलजीतचे स्वप्न होते; परंतु दुखापतीमुळे त्याला धावणे सोडावे लागले. २०१९ मध्ये अवघ्या १५ व्या वर्षी काका दिनेश सोहलो़ट यांच्या मदतीने तो प्रशिक्षक शक्तीपाल यांच्या अकादमीत पोहोचला. परिस्थिती बेताची असल्याने प्रशिक्षकांनी संपूर्ण खर्च उचलला. पुढे राष्ट्रीय स्तरावर नेमबाजीत नाव कमावून तो क्रीडा कोट्यातून भारतीय सैन्यात हवालदार म्हणून दाखल झाला.

हेही वाचा – Kamaljeet Suruchi Gold : महिला क्रिकेटनंतर आता शूटिंगमध्ये भारताचा डंका; दक्षिण कोरियाला धूळ चारत जिंकलं दुसरं गोल्ड!

कष्टाचे चीज अन् नागोयात फडकवला तिरंगा; वडिलांचे डोळे पाणावले!

दारिद्र्य, भीषण अपघात आणि जीवघेण्या दुखापतींवर मात करत कमलजीतने नागोयाच्या रेंजवर सोनेरी कामगिरी केली. या यशानंतर वडील रामतीरथ म्हणाले, “त्या अपघातातून माझा मुलगा जिवंत वाचला, यासाठी मी देवाचा ऋणी आहे; आज त्याने देशासाठी सोने जिंकून आमचे सर्व कष्ट सार्थकी लावले.”