Javelin Double Medals : नीरज चोप्रा नसतानाही भारताचा डंका! भालाफेकमध्ये यशवीरला रौप्य अन् रोहितला कांस्य; नागोयात दुहेरी धमाका
Javelin Double Medals : २०२६ च्या आशियाई क्रीडा स्पर्धेत भारताने भालाफेक प्रकारात दोन पदके जिंकली. नीरज चोप्राने स्पर्धेत भाग घेतला नसतानाही, यशवीर सिंग आणि रोहित यादव यांनी पदके पटकावली.
Asian Games 2026 Mens Javelin Throw Yashvir Singh Silver Rohit Yadav Bronze Medal : जपानमध्ये सुरू असलेल्या आशियाई क्रीडा स्पर्धा २०२६ (Asian Games 2026) मध्ये २८ सप्टेंबरचा दिवस भारतीय ॲथलेटिक्ससाठी ऐतिहासिक ठरला. पुरुषांच्या भालाफेक (Javelin Throw) प्रकारात भारताच्या दोन शिलेदारांनी एकाच वेळी पोडियमवर झेप घेतली. भारताचा युवा स्टार भालाफेकपटू यशवीर सिंगने (Yashvir Singh) चमकदार कामगिरी करत रौप्यपदक (Silver Medal) पटकावलं, तर रोहित यादवने (Rohit Yadav) शानदार प्रदर्शनासह कांस्यपदकावर (Bronze Medal) आपलं नाव कोरलं.
नीरजच्या अनुपस्थितीत पेलली जबाबदारी; भारताचा दुहेरी धमाका!
भारताचा ऑलिम्पिक चॅम्पियन नीरज चोप्रा दुखापतीमुळे या आशियाई स्पर्धेत सहभागी होऊ शकला नव्हता. त्यामुळे देशाच्या पदकाच्या सर्व आशा यशवीर सिंग आणि रोहित यादव यांच्यावर होत्या. या दोन्ही युवा खेळाडूंनी अपेक्षांचे ओझे लीलया पेलत जबरदस्त कामगिरी केली आणि भारताच्या खात्यात एकाच दिवशी दोन पदकं जमा करण्याचा महापराक्रम केला.
यशवीर सिंगची ८५.७२ मीटरची फेक; कारकिर्दीतील सर्वोत्तम कामगिरी!
🇮🇳🇮🇳 𝐓𝐖𝐎 𝐅𝐋𝐀𝐆𝐒. 𝐓𝐖𝐎 𝐌𝐄𝐃𝐀𝐋𝐒. 𝐎𝐍𝐄 𝐏𝐑𝐎𝐔𝐃 𝐍𝐀𝐓𝐈𝐎𝐍. 🥈🥉
Yashvir Singh and Rohit Yadav lit up Nagoya with a DOUBLE PODIUM in the Men’s Javelin at #AsianGames2026🎯🔥
🥈 𝐘𝐀𝐒𝐇𝐕𝐈𝐑 𝐒𝐈𝐍𝐆𝐇: 85.72 m, a PERSONAL BEST 💥
His last three throws all… pic.twitter.com/sdeAkEcuPK
— All India Radio News (@airnewsalerts) September 28, 2026
यशवीर सिंगसाठी ही अंतिम लढत शेवटच्या क्षणापर्यंत अत्यंत थरारक ठरली. त्याने आपल्या अखेरच्या प्रयत्नात ८५.७२ मीटर लांब भाला फेकत स्वतःची वैयक्तिक सर्वोत्तम कामगिरी (Personal Best) नोंदवली. या अफलातून फेकीच्या जोरावर त्यानं थेट दुसऱ्या स्थानावर झेप घेत भारतासाठी खात्रीशीर रौप्यपदक पक्क केलं.
रोहित यादवला ८४.३५ मीटरसह कांस्य; श्रीलंकेच्या पथिरागेला सुवर्ण!
दुसरीकडे, रोहित यादवने ८४.३५ मीटर भाला फेकत तिसरे स्थान राखलं आणि कांस्यपदक मिळवलं. त्याचा अखेरचा प्रयत्न फाऊल ठरला असला तरी आधीचा थ्रो पदकासाठी पुरेशी ठरला. या स्पर्धेत श्रीलंकेच्या उदयोन्मुख रुमेश पथिरागेनं अखेरच्या प्रयत्नात ८८.५५ मीटरचा थ्रो करून सुवर्णपदक पटकावलं. पथिरागेने २०२६ च्या राष्ट्रकुल क्रीडा स्पर्धेतही नीरजला मागे टाकत सुवर्ण जिंकलं होतं.
