Smriti Mandhana Record : स्मृती मानधनाचा वर्ल्ड रेकॉर्ड! ‘हा’ खास पराक्रम करणारी ठरली जगातील पहिलीच महिला फलंदाज
Smriti Mandhana Record : भारतीय महिला क्रिकेट संघाची स्टार खेळाडू स्मृती मंधाना आता आंतरराष्ट्रीय क्रिकेटमध्ये असा पराक्रम केला आहे, जो जगातील कोणत्याही महिला फलंदाजांना करता आलेला नाही.
Asian Games 2026 India Women Cricket Team Wins Gold Smriti Mandhana 11000 International Runs : जपानमधील नागोया येथे सुरू असलेल्या आशियाई क्रीडा स्पर्धा २०२६ (Asian Games 2026) च्या महिला क्रिकेट स्पर्धेत भारताने पुन्हा एकदा आपले वर्चस्व सिद्ध केले आहे. अंतिम सामन्यात भारतीय महिला क्रिकेट संघाने श्रीलंकेचा १४७ धावांच्या प्रचंड फरकाने धुव्वा उडवत सलग दुसऱ्यांदा सुवर्णपदकावर (Gold Medal) आपले नाव कोरले. यापूर्वी भारताने २०२३ मध्येही सुवर्ण पटकावले होते. या ऐतिहासिक विजयात भारताची स्टार सलामीवीर स्मृती मानधनाने (Smriti Mandhana) ४५ चेंडूंत ७९ धावांची तुफानी खेळी साकारत आंतरराष्ट्रीय क्रिकेटविश्वात एका अभूतपूर्व जागतिक विक्रमाला गवसणी घातली.
आंतरराष्ट्रीय क्रिकेटमध्ये ११,००० धावा; जगातील पहिलीच महिला खेळाडू!
या अंतिम सामन्यात मैदानात उतरताच स्मृती मानधनाने महिला क्रिकेटच्या इतिहासातील सर्वात मोठा टप्पा गाठला. ती आंतरराष्ट्रीय क्रिकेटच्या तिन्ही फॉरमॅटमध्ये मिळून ११ हजार धावा पूर्ण करणारी जगातील पहिली आणि एकमेव महिला खेळाडू ठरली आहे. याआधी उपांत्य फेरीत तिने भारताची माजी कर्णधार मिताली राजचा सर्वाधिक १०,८६८ आंतरराष्ट्रीय धावांचा विक्रम मोडीत काढला होता. आता तिने थेट ११ हजार धावांचा एव्हरेस्ट सर करत नवा इतिहास रचला आहे.
स्मृतीची अफलातून आंतरराष्ट्रीय कारकीर्द; तिन्ही फॉरमॅटमध्ये वर्चस्व!
𝗙𝗜𝗥𝗦𝗧 𝗪𝗢𝗠𝗔𝗡 𝗧𝗢 𝗦𝗖𝗢𝗥𝗘 1️⃣1️⃣,0️⃣0️⃣0️⃣ 𝗜𝗡𝗧𝗘𝗥𝗡𝗔𝗧𝗜𝗢𝗡𝗔𝗟 𝗥𝗨𝗡𝗦 🌟
Smriti Mandhana with another magnificent milestone to her name 🫡
Updates ▶️ https://t.co/x367kJHmrc#TeamIndia | #AsianGames pic.twitter.com/QJ3B4hYXYh
— BCCI Women (@BCCIWomen) September 22, 2026
मानधनाने आतापर्यंत ९ कसोटी सामन्यांत २ शतके आणि ५ अर्धशतकांसह ७८८ धावा केल्या आहेत. एकदिवसीय (ODI) क्रिकेटमध्ये तिने १२० सामन्यांत १४ शतके व ३५ अर्धशतकांच्या जोरावर ५,४११ धावा उभारल्या आहेत. तर आंतरराष्ट्रीय टी-२० मध्ये १७९ सामन्यांत २ शतके आणि ३७ अर्धशतकांसह तिच्या नावावर ४,८६७ धावांची नोंद झाली आहे. सातत्यपूर्ण फलंदाजीच्या जोरावर तिने जागतिक क्रिकेटवर आपली वेगळी छाप सोडली आहे.
अंतिम फेरीत भारताने प्रथम फलंदाजी करताना २० षटकांत २१६ धावांचा विशाल डोंगर उभारला. स्मृतीने ५ चौकार व ७ षटकारांसह ७९ धावा ठोकल्या, तर शफाली वर्माने ४८ आणि ऋचा घोषने २२ चेंडूंत नाबाद ४९ धावांची फटकेबाजी केली. २१७ धावांच्या आव्हानापुढे श्रीलंकेचा संघ अवघ्या ६९ धावांत गारद झाला आणि भारताने १४७ धावांनी सामना जिंकत अभिमानाने सुवर्णपदक पटकावले.
