Kane Williamson Retirement Revelation Virat Kohli Phone Call Story : न्यूझीलंडचा दिग्गज फलंदाज आणि माजी कर्णधार केन विल्यमसनने आपल्या निवृत्तीच्या निर्णयामागील अत्यंत भावनिक आणि रंजक कहाणी पहिल्यांदाच उघड केली आहे. जून २०२६ मध्ये प्रदीर्घ १६ वर्षांच्या शानदार आंतरराष्ट्रीय कारकिर्दीला पूर्णविराम देणाऱ्या विल्यमसनने एका पॉडकास्टमध्ये मोठा खुलासा केला. निवृत्तीची अधिकृत घोषणा करण्याच्या अवघ्या एक दिवस आधी त्याने भारताचा महान फलंदाज विराट कोहलीशी फोनवर प्रदीर्घ संवाद साधला होता; आणि या एकाच फोन कॉलनंतर त्याचा निवृत्तीचा निर्णय कायमस्वरूपी पक्का झाला.

निवृत्तीच्या एक दिवस आधी विराटला फोन; संवादाने निर्णय पक्का

आपल्या निर्णयाचा उलगडा करताना विल्यमसन म्हणाला, “मी निवृत्तीबाबत माझ्या मोजक्या जवळच्या लोकांशी चर्चा केली होती. मात्र, घोषणा करण्याच्या आदल्या दिवशी माझी विराटशी अतिशय सखोल चर्चा झाली. तो संवाद म्हणजे आरशात स्वतःला पाहण्यासारखा होता. आम्ही दोघे पूर्णपणे वेगवेगळ्या देशात राहत असलो, तरी आमच्या आयुष्यात अनेक साम्ये होती. देशाचे कर्णधारपद सांभाळणे असो किंवा एकाच काळात बाप होण्याचा अनुभव असो, आमचा जीवनप्रवास समांतर राहिला आहे.” हा फोन ठेवताच त्याने पत्नीला निवृत्तीची वेळ आल्याचे सांगितले.

१० हजार धावांच्या उंबरठ्यावर असताना क्रिकेटला अलविदा –

विल्यमसनच्या या अचानक निर्णयाने जागतिक क्रिकेट चाहत्यांना मोठा धक्का बसला होता. त्याने न्यूझीलंडसाठी १६ वर्षांच्या कारकिर्दीत सर्वाधिक १९,३४६ आंतरराष्ट्रीय धावा कुटल्या असून यात ४८ शतके आणि दोन द्विशतकांचा समावेश आहे. कसोटीत त्याने ९,५१५ धावा व ३३ शतके केली होती. कसोटीत १० हजार धावांचा जादुई टप्पा गाठण्यासाठी तो अवघ्या ४८५ धावा दूर असताना त्याने निवृत्ती पत्करली. विशेष म्हणजे, विराटनेही २०२५ मध्ये ९,२३० कसोटी धावांवर असताना कसोटी क्रिकेटला अलविदा केला होता.

Kane Williamson talks to virat kohli before taking retirement 🥺 https://t.co/MkraX6B1zv

— Amrit (@kohliiix18) November 9, 2026

आयुष्यातील प्राधान्यक्रम बदलले; खेळाकडे पाहण्याचा दृष्टिकोन बदलला

कारकिर्दीला पूर्णविराम देण्याचे मुख्य कारण स्पष्ट करताना विल्यमसन म्हणाला, “तब्बल १६ वर्षे दररोज सकाळी उठून स्वतःला आणि संघाला अधिक चांगले बनवण्याचा एकच विचार मनात असायचा. परंतु, इतकी प्रदीर्घ वर्षे खेळल्यानंतर आयुष्यातील प्राधान्ये बदलणे अपरिहार्य असते. तुम्ही एखाद्या खेळावर जिवापाड प्रेम करू शकता, सर्वस्व देऊ शकता; पण एका टप्प्यावर तो खेळ सोडून देण्याची वेळ येतेच.”

हेही वाचा – Zimbabwe World Record : झिम्बाब्वेने विश्वविक्रमाला घातली गवसणी! १४९ वर्षांच्या कसोटी क्रिकेटच्या इतिहासात कोणालाच न जमलेला केला पराक्रम

ज्या कारणांवर विश्वास उरला नाही, त्यासाठी खेळणे व्यर्थ –

🥺 A SPECIAL BOND BETWEEN TWO MODERN-DAY GREATS!

Speaking on the Between Two Beers podcast, Kane Williamson revealed he had a heartfelt conversation with Virat Kohli just a day before he announced his retirement.

From leading their nations to raising families, the two shared so many similar experiences. A friendship built beyond the boundary! 🤝🏏

— Razed Cricket (@RazedCricket) November 9, 2026

तो पुढे परखडपणे म्हणाला, “जर तुम्ही अशा कारणांसाठी खेळत राहिलात जी आता तुमची राहिलेली नाहीत, तर तुम्ही फार काळ मैदानात टिकू शकत नाही. मला घाईघाईत कोणताही निर्णय घ्यायचा नव्हता, पण माझा खेळाकडे बघण्याचा दृष्टिकोन बदलत चालला होता.” शेवटी मनाचा कौल घेत आणि विराटशी चर्चा करून त्याने क्रिकेटला कायमचा रामराम ठोकण्याचा परिपक्व निर्णय घेतला.