Asian Boxing Championships 2026 India :आशियाई बॉक्सिंग चॅम्पियनशिप २०२६ मध्ये भारतीय मुष्टियोध्यांनी आपला दबदबा कायम राखला आहे. स्पर्धेच्या तिसऱ्या दिवशी विश्वनाथ सुरेश आणि सचिन या युवा बॉक्सर्सनी आपापल्या वजन गटात प्रतिस्पर्ध्यांना धूळ चारत पुढच्या फेरीत प्रवेश निश्चित केला आहे. आशियाई बॉक्सिंग चॅम्पियनशिपमध्ये भारताच्या विश्वनाथ सुरेशने आपल्या तांत्रिक कौशल्याच्या जोरावर ५० किलो वजनी गटात किर्गिस्तानच्या बेकजात एर्गेशोवचा ५-० असा धुव्वा उडवला. सामन्याच्या सुरुवातीपासूनच विश्वनाथने रिंगमध्ये आपले वर्चस्व राखले होते. मात्र, पुढच्या फेरीत त्याच्यासमोर २०२५ चा जागतिक विजेता कझाकिस्तानच्या संझार ताशकेनबेचे कठीण आव्हान असणार आहे. सचिनची झुंजार खेळी – ६० किलो वजनी गटात सचिनने मंगोलियाच्या बुयांदलाई बायारखू विरुद्ध अटीतटीच्या लढतीत ४-१ अशा फरकाने विजय मिळवला. प्रचंड दडपण असतानाही सचिनने संयम गमावला नाही आणि आपली रणनीती यशस्वीपणे राबवली. आता त्याचा पुढील मुकाबला चिनी तैपेईच्या चेंग-वेई ली याच्याशी होईल. प्रीती आणि दीपकचा शानदार श्रीगणेशा – स्पर्धेच्या पहिल्याच दिवसापासून भारतीय संघाने पदकाच्या दिशेने वेगाने पावले उचलली आहेत. ५४ किलो महिला गटात सुवर्णपदक विजेत्या प्रीती पवारने कझाकिस्तानच्या एलिना बाजारोवाचा ५-० असा पराभव केला. तर ७० किलो पुरुष गटात दीपकने उझबेकिस्तानच्या खवासबेक असादुल्लाएव विरुद्ध ३-२ असा निसटता पण महत्त्वाचा विजय नोंदवला. हेही वाचा – Rishabh Pant Run Out : ऋषभ पंतसोबत काय झालं? एकानावर नशिबाचा क्रूर खेळ; मुकेश कुमारच्या एका स्पर्शाने झाला घात दुसऱ्या दिवशी महिलांच्या ६० किलो गटात प्रियाने कझाकिस्तानच्या रिम्मा वोलोसेंकोवर ५-० ने विजय मिळवला. मात्र, ५५ किलो गटात जादुमणि सिंहला जपानच्या रुई यामागुचीकडून २-३ असा पराभव स्वीकारावा लागला. एकूणच भारतीय बॉक्सर्सची कामगिरी पाहता या स्पर्धेत भारताला मोठी पदकं मिळण्याची दाट शक्यता आहे.