Asia Cup 2025 SL vs PAK Match News : आशिया कपच्या सुपर फोर फेरीतील पहिल्या सामन्यातील पराभवातून सावरत श्रीलंका आणि पाकिस्तान या दोन्ही संघांना मंगळवारी होणाऱ्या महत्त्वपूर्ण सामन्यात विजय मिळवण्याची संधी आहे. रविवारी सुपर फोरमध्ये भारताकडून पाकिस्तानला दारुण पराभव पत्करावा लागला, ज्यामुळे त्यांचे मनोबल खचले आहे. जर श्रीलंकेनेही त्यांना पराभूत केले, तर पाकिस्तान अंतिम फेरीच्या शर्यतीतून बाहेर पडेल.

श्रीलंकेची लय खंडित –

श्रीलंका गट फेरीत अपराजित राहिला, पण सुपर फोरच्या पहिल्या सामन्यात बांगलादेशने त्यांना चार गडी राखून पराभूत केले. यामुळे टी-20 आशिया कपमधील त्यांच्या आठ सामन्यांच्या विजयी मालिकेला खीळ बसली आणि त्यांची लय खंडित झाली. दुसरीकडे, सलमान आघाच्या नेतृत्वाखालील पाकिस्तानी संघाला विजयासाठी सर्वतोपरी प्रयत्न करावे लागणार आहेत. बाबर-रिझवान यांच्या अनुपस्थितीत पाकिस्तानची फलंदाजी कमकुवत ठरली आहे. त्यांचे फलंदाज तंत्र आणि आक्रमकतेच्या बाबतीत अननुभवी दिसले.

पाकिस्तानची फलंदाजी अडखळली –

भारताविरुद्धच्या सामन्यात पाकिस्तानच्या साहिबजादा फरहान, फखर झमान आणि सैम अयूब यांनी चांगली चांगली सुरुवात केली. मात्र, साहिबजादा फरहान व्यतिरिक्त कोणत्याही फलंदाजाला आपल्या खेळीचे मोठ्या डावात रुपांतर करण्यात यश आले नाही. सैमने सलग तीन सामन्यांत शून्यावर बाद झाल्यानंतर चांगली कामगिरी केली, पण दुसऱ्या सत्रात पाकिस्तानी फलंदाज लय टिकवू शकले नाहीत. गोलंदाजीतही लेगस्पिनर अबरार अहमद फक्त ओमान आणि यूएईसारख्या संघांविरुद्ध प्रभावी ठरला, पण भारतीय फलंदाजांना तो अजिबात त्रास देऊ शकला नाही.

हेही वाचा – रॉबिन उथप्पा ईडी कार्यालयात दाखल ;ऑनलाइन बेटिंग अॅप प्रकरणी चौकशी सुरु

श्रीलंकेची मधली फळी चिंतेचा विषय –

श्रीलंका संघासाठी चिंतेची बाब म्हणजे त्यांची कमकुवत मधली फळी आहे. दासुन शनाकाने बांगलादेशविरुद्ध पाचव्या क्रमांकावर चांगली फलंदाजी केली, पण गट फेरीत सलग दोन अर्धशतके ठोकणारा पथुम निसांका सध्या लय पुन्हा मिळवण्यासाठी धडपडतोय. कुसल मेंडिस आणि कामिल मिशारा चांगल्या फॉर्मात असून, त्यांच्याकडून स्थिरता मिळू शकते. गोलंदाजीत श्रीलंकेचा वेगवान गोलंदाज नुवान तुषाराने प्रभावित केले असून, त्याने स्पर्धेत सहा गडी बाद केले आहेत. फिरकीपटू वानिंदु हसरंगा, दुष्मंथा चमिरा, चरित असलंका आणि शनाका यांनीही महत्त्वपूर्ण योगदान दिले आहे.

हेही वाचा – IND vs PAK : भारताचा अजिंक्यरथ सुसाट! अभिषेक-शुबमनच्या धमाक्याने पाकिस्तानची उडाली दाणादाण

उद्याचा सामना ठरणार निर्णायक –

पाकिस्तान आणि श्रीलंका यां दोन्ही संघांना सुपर फोरमध्ये पुनरागमन करायचे आहे. पाकिस्तानला त्यांच्या फलंदाजी आणि गोलंदाजीतील कमतरता दूर कराव्या लागतील, तर श्रीलंकेला मधल्या फळीला बळकटी द्यावी लागेल. हा सामना दोन्ही संघांसाठी अंतिम फेरीच्या दृष्टीने निर्णायक ठरेल.