Ashadhi Wari – संतश्रेष्ठ श्री ज्ञानेश्वर महाराजांच्या आषाढी पायी वारी पालखी सोहळ्याच्या पार्श्वभूमीवर पुरंदर तालुक्यातील आरोग्य विभागाने व्यापक नियोजन पूर्ण केले असून, झेंडेवाडी ते नीरा या पालखी मार्गावर वारकऱ्यांना तत्पर आणि दर्जेदार आरोग्य सेवा देण्यासाठी संपूर्ण यंत्रणा सज्ज करण्यात आली आहे. अशी माहिती तालुका आरोग्य अधिकारी डॉ. विक्रम काळे यांनी दिली.

बुधवार (दि. ८) ते शनिवार (दि. २५) जुलैदरम्यान होणाऱ्या पालखी सोहळ्यात शनिवार (दि. ११) आणि रविवार (दि. १२) जुलै रोजी लाखो वारकरी पुरंदर तालुक्यातून मार्गक्रमण करणार आहेत. त्यांची आरोग्य सुरक्षितता लक्षात घेऊन पंचायत समिती पुरंदरच्या आरोग्य विभागाने विशेष उपाययोजना केल्या आहेत. पालखी मार्गावरील गावांचे कीटकशास्त्रीय सर्वेक्षण पूर्ण करण्यात आले असून, सासवड व जेजुरी शहरांचाही त्यात समावेश आहे.

कीटकजन्य व संसर्गजन्य आजारांचा प्रादुर्भाव रोखण्यासाठी धूर फवारणी, विहिरींचे निर्जंतुकीकरण तसेच पिण्याच्या पाण्याच्या गुणवत्तेची तपासणी सुरू आहे. यासाठी २६४ पाण्याचे नमुने आणि २९ टीसीएल नमुने राज्य आरोग्य प्रयोगशाळा, पुणे येथे पाठविण्यात आले आहेत. वारकऱ्यांना सुरक्षित अन्न मिळावे यासाठी पालखी मार्गावरील हॉटेल्स व खाद्यपदार्थ विक्री केंद्रांची तपासणी करण्यात येत आहे.

झेंडेवाडी, सासवड, जेजुरी, वाल्हा आणि निरा येथे तसेच पालखी मुक्कामस्थळी अतिदक्षता वैद्यकीय सुविधा उपलब्ध करून देण्यात येणार आहेत. संपूर्ण पालखी मार्गावर प्रत्येक दोन किलोमीटर अंतरावर आरोग्य सेवा पथके तैनात राहणार आहेत. झेंडेवाडी, दिवे, शिवरी, बेलसर फाटा, दौंडज, प्राथमिक आरोग्य केंद्र वाल्हे आणि प्राथमिक आरोग्य केंद्र नीरा येथे २४ तास वैद्यकीय सेवा उपलब्ध राहणार आहे.

तसेच ग्रामीण रुग्णालय सासवड, ग्रामीण रुग्णालय जेजुरी, प्राथमिक आरोग्य केंद्र वाल्हा आणि प्राथमिक आरोग्य केंद्र निरा येथे बाह्यरुग्ण व आंतररुग्ण सेवा अखंड सुरू राहणार असून, आपत्कालीन परिस्थितीसाठी औषधसाठा, वैद्यकीय साहित्य व प्रशिक्षित मनुष्यबळ सज्ज ठेवण्यात आले आहे. पुणे परिमंडळाचे आरोग्य उपसंचालक डॉ. भगवान पवार, जिल्हा आरोग्य अधिकारी डॉ. रामचंद्र हंकारे यांच्या मार्गदर्शनाखाली, वारकऱ्यांना सुरक्षित, स्वच्छ आणि दर्जेदार आरोग्य सेवा देण्यावर प्रशासनाचा भर असल्याचे डॉ. काळे यांनी सांगितले.

१४८ अधिकारी-कर्मचारी सेवेत
आषाढी पालखी सोहळ्यासाठी आरोग्य विभागाकडून १४८ अधिकारी व कर्मचाऱ्यांची नियुक्ती करण्यात आली आहे. यामध्ये ११ वैद्यकीय अधिकारी, २५ समुदाय आरोग्य अधिकारी, ७ पुरुष आरोग्य सहाय्यक, ४ महिला आरोग्य सहाय्यक, ३५ आरोग्य सेवक, २५ आरोग्य सेविका, ५ मिश्रक आणि ५ शिपाई यांचा समावेश आहे. हिवताप आरोग्य पर्यवेक्षक प्रकाश चवरे, हिवताप आरोग्य सहाय्यक राहुल टकले तसेच तालुका कार्यालयातील सहाय्यक शिवाजी भोसकर आणि दादासाहेब जगताप हे या पथकांच्या कामकाजाचा समन्वय करणार आहेत.