Arvind Kejriwal | Amit Shah | Lok Sabha Election 2024 – पंजाबचे लोक पाकिस्तानी आहेत का? गुजरात, गोवा, उत्तर प्रदेश, आसाम, मध्य प्रदेश आणि देशातील अनेक भागातील लोकांनी आम्हाला प्रेम आणि विश्वास दिला. या देशातील सर्व लोक पाकिस्तानी आहेत का? तुम्हाला याचा इतका अभिमान आहे की तुम्ही लोकांना शिवीगाळ आणि धमक्या देण्यास सुरुवात करता.

तुम्ही अजून पंतप्रधान बनला नाही आणि इतका अहंकारी झाला आहात, अशा शब्दांत आम आदमी पक्षाचे प्रमुख आणि दिल्लीचे मुख्यमंत्री अरविंद केजरीवाल यांनी केंद्रिय गृहमंत्री अमित शहा यांना फैलावर घेतले आहे.

केजरीवाल म्हणाले की, निवडणुकीचा पाचवा टप्पा संपला असून मोदी सरकार ४ जूनला पायउतार होणार असल्याचे स्पष्ट झाले आहे. भारतात आघाडीचे सरकार येणार आहे. अनेकांनी याबाबत सर्वेक्षण केले आहे. इंडिया आघाडीला स्वबळावर ३०० हून अधिक जागा मिळत असल्याचे समोर आले आहे.

स्वच्छ आणि कायमस्वरूपी सरकार स्थापन होईल. त्यामुळे भाजपाचे नेते बिथरले आहेत. काल अमित शहांच्या दिल्लीतल्या सभेला 500 पेक्षा कमी लोक होते, याकडे लक्ष वेधून केजरीवाल म्हणाले की, त्यांनी देशातील जनतेला शिवीगाळ केली आहे. आम आदमी पार्टीचे समर्थक पाकिस्तानी असल्याचे त्यांनी सांगितले. तोल सुटल्याने ते आता विखारी विधाने करत आहेत.

केजरीवाल असेही म्हनाले की, पंतप्रधानांनी तुमची उत्तराधिकारी म्हणून निवड केली आहे. आतापासून तुम्ही अहंकारी झाला आहात. अमित शहा हे लोकांना पंतप्रधान म्हणून मान्य नाहीत. तुमचे सरकार जात आहे. म्हणून देशातील जनतेला शिवीगाळ केली तर देश खपवून घेणार नाही. योगीही दिल्लीत आले होते. तुमचे खरे शत्रू तुमच्या पक्षात बसले आहेत.