कानपूर  :- इंडियन इन्स्टिट्यूट ऑफ टेक्‍नॉलॉजी-कानपूरने क्‍लाउड सीडिंगसाठी फ्लाइट चाचणी यशस्वीपणे घेतली. आयआयटी-के ने गुरुवारी जारी केलेल्या निवेदनात म्हटले आहे की, संस्थेने 21 जून रोजी क्‍लाउड सीडिंगसाठी चाचणी उड्डाण केले.

हा प्रकल्प काही वर्षांपूर्वी आयआयटी कानपूर येथे सुरू करण्यात आला होता आणि संगणक विज्ञान आणि अभियांत्रिकी विभागाचे प्राध्यापक मनिंद्र अग्रवाल यांच्या अध्यक्षतेखाली तो आहे. हा प्रयोग नागरी विमान मंत्रालयाच्या संचालकांच्या मान्यतेने करण्यात आला.

क्‍लाउड सीडिंगमध्ये वर्षाव होण्याची शक्‍यता वाढवण्याच्या उद्देशाने सिल्व्हर आयोडाइड, कोरडा बर्फ, मीठ आणि इतर घटक यांसारख्या विविध रासायनिक घटकांचा वापर केला जातो.

याबाबत प्राध्यापक मनिंद्र अग्रवाल यांनी सांगितले की, “क्‍लाउड सीडिंगसाठी आमची चाचणी यशस्वी झाल्याचा आम्हाला आनंद आहे. यशस्वी चाचणी उड्डाणाचा अर्थ असा आहे की आता आम्ही नंतरच्या टप्प्यात क्‍लाउड सीडिंग करण्यास तयार आहोत आणि ते यशस्वी करू.

मनिंद्र पुढे म्हणाले, “आम्ही गेल्या काही वर्षांपासून या प्रकल्पावर काम करत आहोत. कोविड महामारीमुळे खरेदी प्रक्रियेस विलंब झाला होता, परंतु आता, डीजीसीएकडून मंजुरी मिळाल्यानंतर आणि पहिली चाचणी यशस्वीरित्या पूर्ण झाल्यानंतर, आम्ही पूर्ण करण्याच्या जवळ आहोत. हे विमान सुमारे 5000 फूट उंचीवर गेले आणि चाचणी पूर्ण केल्यानंतर आयआयटी कानपूर फ्लाइट लॅब एअरस्ट्रिपवर परतले.