Rohit Pawar : महाराष्ट्र लोकसेवा आयोगामार्फत (MPSC) घेण्यात येणाऱ्या औषध निरीक्षक पदाच्या परीक्षेचा पेपर फुटल्याच्या प्रकरणामुळे राज्यातील राजकीय वातावरण चांगलेच तापले आहे. पेपरफुटीच्या घटनेनंतर विद्यार्थ्यांमध्येही मोठी नाराजी पाहायला मिळाली.

या प्रकरणावर शरद पवार गटाचे आमदार रोहित पवार यांनी आक्रमक भूमिका घेतली असून, आता त्यांनी MPSC आयोगाच्या अध्यक्षपदाबाबत मोठी मागणी केली आहे.

MPSC आयोगाच्या अध्यक्षपदी तुकाराम मुंढे यांची नियुक्ती करावी, अशी मागणी रोहित पवार यांनी केली आहे. आयोगाच्या अध्यक्षपदासाठी असलेल्या निकषांचा आपण अभ्यास केला असून, त्या अटींनुसार तुकाराम मुंढे अध्यक्ष होऊ शकतात, असा दावा त्यांनी केला आहे.

पेपरफुटीविरोधात विद्यार्थ्यांचा पुण्यात मोर्चा

औषध निरीक्षक पदाचा पेपर फुटल्याची घटना समोर आल्यानंतर परीक्षार्थी विद्यार्थ्यांमध्ये संतापाची लाट पसरली. पुण्यात मोठ्या संख्येने विद्यार्थ्यांनी एकत्र येत पेपरफुटीविरोधात मोर्चा काढला. या आंदोलनात आमदार रोहित पवार यांच्यासह विरोधी पक्षातील काही नेतेही सहभागी झाले होते.

या मोर्चादरम्यान महाराष्ट्र लोकसेवा आयोगाचे अध्यक्ष विवेक भीमनवार यांच्या राजीनाम्याची मागणी करण्यात आली. पेपरफुटी प्रकरणात जबाबदारी निश्चित करून दोषींवर कठोर कारवाई करावी, अशी मागणीही विद्यार्थ्यांकडून करण्यात आली.

रोहित पवारांचा विवेक भीमनवार यांच्यावर गंभीर आरोप

MPSC अध्यक्ष विवेक भीमनवार यांच्यावर रोहित पवार यांनी गंभीर आरोप केले. भीमनवार यांची कारकीर्द वादग्रस्त राहिल्याचा दावा करत त्यांनी त्यांच्या पूर्वीच्या कार्यकाळावरही प्रश्न उपस्थित केले.

रोहित पवार म्हणाले की, “MPSC आयोगाचे अध्यक्षच वादग्रस्त आहेत. त्यांनी अगोदरच्या विभागातही अनेक गोंधळ घातले आहेत. विवेक भीमनवार यांची कारकीर्दच वादग्रस्त ठरली आहे. अनेकांनी त्यांच्या नियुक्तीला विरोध केला होता.”

तसेच भीमनवार हे संबंधित विभागात आयुक्त असताना भ्रष्टाचार झाल्याचे आरोप करत त्यासंदर्भातील पुरावे मुख्यमंत्री आणि राज्यपालांना दिल्याचा दावाही रोहित पवार यांनी केला. RTO विभागातील कथित गैरप्रकारांबाबतही त्यांनी आरोप केले. “अजून ४० टक्के पुरावेच आम्ही सगळ्यांसमोर आणले आहेत. आम्ही लढणार आणि या माणसाचा राजीनामा झालाच पाहिजे,” अशी भूमिका त्यांनी मांडली.

‘तुकाराम मुंढेंना MPSC अध्यक्ष करा’

सध्याच्या परिस्थितीवर बोलताना रोहित पवार यांनी MPSC च्या अध्यक्षपदासाठी तुकाराम मुंढे यांचे नाव सुचवले आहे. “तुकाराम मुंढे यांना MPSC आयोगाच्या अध्यक्षपदावर बसवा. मी सगळं चेक केलं आहे. ज्या अटी आहेत, त्यानुसार तुकाराम मुंढेसाहेब अध्यक्ष होऊ शकतात,” असे रोहित पवार म्हणाले.विवेक भीमनवार यांच्याविरोधात कारवाई झाली नाही, तर मुख्यमंत्री त्यांना पाठीशी घालत असल्याचा आरोपही त्यांनी केला. भीमनवार हे मुख्यमंत्र्यांचे मित्र असल्याचा दावाही रोहित पवार यांनी केला आहे.

BRICS Summit 2026: पंतप्रधान मोदी नाही, मग ‘मित्र’ पुतिन यांच्या स्वागतासाठी विमानतळावर कोण?