पुणेः कुख्यात गुंड गजा मारणे याच्या नावाने सोशल मीडियावर अकाउंट तयार करून गुन्हेगारीला प्रोत्साहन देणाऱ्या चौघांना पुणे पोलिसांनी अटक केली आहे. गजा मारणेच्या नावाने इन्स्टाग्राम पेज तयार करून त्यावर गुन्हेगारीला प्रोत्साहन देणाऱ्या पोस्टस आणि रिल्स व्हायरल केले जात होते. या प्रकरणी पोलिसांच्या गुन्हे शाखेने धाराशिवमधून एकाला ताब्यात घेतले आहे. त्याने हे अकाउंट तयार करून पोस्ट आणि रिल्स व्हायरल केल्या असल्याचे पोलीस तपास समोर आले आहे.

इन्स्टाग्राम किंवा इतर सोशल मीडियाच्या प्लॅटफॅार्मवरून गुंडीगिरीचे समर्थन करणाऱ्या पोस्टस आणि व्हिडिओ शेअर करणाऱ्या तीन आरोपींना पोलिसांनी अटक केली आहे. त्यामुळे अशा प्रकारच्या पोस्ट किंवा व्हिडिओ सोशल मीडियाच्या माध्यमातून शेअर करणाऱ्यांवर पोलिसांची करडी नजर असणार आहे. त्यामुळे पोलिसांनी अशा पेजेस आणि अकाउंट्सवर कारवाई करण्यास सुरूवात केली आहे.

धाराशिवचा एक तरुण गजा मारणेच्या नावाने सोशल मीडिया अकाउंट चालवत आहे. त्याच्या पेजला तब्बल एक लाखांहून अधिक फॉलोअर्स होते. तो गजा मारणे आणि इतर गुन्हेगारांचे फोटो, व्हिडिओ, तसेच गुन्हेगारीला प्रोत्साहन देणाऱ्या पोस्ट्स व्हायरल करत होता, अशी माहिती गुन्हे शाखेचे पोलीस उपायुक्त निखिल पिंगळे यांनी दिली आहे. या प्रकरणी बंडगार्डन पोलीस ठाण्यात गुन्हा दाखल करण्यात आला आहे. या प्रकरणाचा पुढील तपास पोलीस करीत आहेत.