पुणे – आंबेगाव पोलिसांनी परराज्यातील एका अट्टल घरफोडी चोराला अटक करून तीन गुन्ह्यांचा छडा लावला आहे. या कारवाईत आरोपीकडून २ लाख १७ हजार रुपयांचा मुद्देमाल जप्त करण्यात आला आहे. व्यंकटेश रमेश (वय २२, रा. कोथरुड, मूळ गाव बंगलोर) असे अटक करण्यात आलेल्या आरोपीचे नाव आहे. पोलिसांनी दिलेल्या माहितीनुसार, आंबेगाव बुद्रुक परिसरातील शिलाई वर्ल्डजवळ एका घरात घरफोडी झाल्याची घटना घडली होती. या प्रकरणाचा तपास करताना पोलिसांनी सीसीटीव्ही फुटेजच्या आधारे आरोपीचा शोध लावला. हा आरोपी मूळचा बंगलोरचा असून, कोथरुड येथील एका पेइंग गेस्ट (पीजी)मध्ये राहत होता. पोलिसांनी त्याला ताब्यात घेतल्यानंतर त्याने गुन्ह्याची कबुली दिली. त्याच्याकडून आंबेगाव, बावधान आणि लोणीकंद येथील घरफोडीच्या घटना उघडकीस आल्या असून, चोरीचा सर्व मुद्देमाल हस्तगत करण्यात आला आहे. पोलिसांची यशस्वी कारवाई- या प्रकरणाचा तपास पोलिस उपनिरीक्षक मोहन कळमकर करत आहेत. ही कारवाई वरिष्ठ पोलिस निरीक्षक शरद झिने, उपनिरीक्षक मोहन कळमकर, पोलीस अंमलदार शेलेंद्र साठे, हनमंत मासाळ, चेतन गोरे, निलेश जमदाडे, धनाजी धोत्रे, प्रमोद भोसले, सुभाष मोरे, नितीन कातुर्डे, योगेश जगदाळे आणि समाधान कांबळे यांच्या पथकाने केली. या पथकाने अचूक नियोजन आणि तपासाद्वारे आरोपीला जेरबंद करण्यात यश मिळवले. आंबेगाव पोलिसांच्या या कामगिरीमुळे परिसरातील घरफोडीच्या घटनांना आळा बसण्यास मदत होईल, अशी अपेक्षा व्यक्त केली जात आहे.
