SSC Result 2026 : महाराष्ट्र राज्य माध्यमिक आणि उच्च माध्यमिक शिक्षण मंडळाच्या दहावीच्या निकालात अनेक विद्यार्थ्यांनी उल्लेखनीय यश संपादन केले. मात्र, अकलूजमधील एका मायलेकीची यशोगाथा सध्या सर्वांचे लक्ष वेधून घेत आहे. आई आणि मुलगी दोघींनीही एकाचवेळी दहावीची परीक्षा देत उत्तीर्ण होण्याचा अनोखा योग साधला आहे. त्यामुळे अकलूज परिसरात त्यांच्यावर अभिनंदनाचा वर्षाव होत आहे. (SSC Result 2026)

अकलूज येथील जिजामाता कन्या प्रशालेत शिक्षण घेणारी कु. लक्ष्मी नागनाथ क्षीरसागर हिने दहावीच्या परीक्षेत ५०० पैकी ४११ गुण मिळवत ८२.२० टक्के गुणांसह उत्तीर्ण होण्याचा मान मिळवला. विशेष म्हणजे तिची आई पूजा नागनाथ क्षीरसागर यांनीही वयाच्या ३७व्या वर्षी दहावीची परीक्षा देत ५०० पैकी २१८ गुण मिळवून ४३.६० टक्क्यांसह यश मिळवले आहे. (SSC Result 2026)

पूजा क्षीरसागर या सध्या यशवंतनगर येथील सावित्रीबाई फुले लोकसंचलित साधन केंद्रात सीआरपी पदावर कार्यरत आहेत. अपुऱ्या शिक्षणामुळे कामकाजात अनेक अडचणी येत असल्याची जाणीव झाल्यानंतर त्यांनी पुन्हा शिक्षण घेण्याचा निर्धार केला. घरकाम, नोकरी आणि संसार सांभाळत त्यांनी मुलीसोबत अभ्यास सुरू केला आणि अखेर दहावीची परीक्षा उत्तीर्ण होत स्वतःचे स्वप्न पूर्ण केले. (SSC Result 2026)

आईच्या या प्रवासात मुलगी लक्ष्मीनेही मोठी साथ दिली. दोघीही एकत्र अभ्यास करत होत्या. वेळ मिळेल तसा अभ्यास, नोट्सची देवाणघेवाण आणि परस्परांना प्रोत्साहन देत त्यांनी हे यश मिळवले. त्यामुळे या मायलेकीचे सर्व स्तरातून कौतुक केले जात आहे. (SSC Result 2026)

दरम्यान, पूजा क्षीरसागर यांनी आता मुलगी लक्ष्मीला इंजिनिअर बनवण्याचे स्वप्न व्यक्त केले आहे. लक्ष्मीचाही पुढील शैक्षणिक प्रवास याच ध्येयाने सुरू होणार असल्याचे कुटुंबीयांनी सांगितले. (SSC Result 2026)

जुळ्या भावंडांचाही अनोखा योगायोग   (SSC Result 2026)

दहावीच्या निकालात आणखी एक विशेष योगायोग समोर आला आहे. जुळ्या भाऊ-बहिणींनी तब्बल ९७.८० टक्के इतके समान गुण मिळवत सर्वांचे लक्ष वेधले. बहिणीने सोशल स्टडीजमध्ये अधिक गुण मिळवले, तर भावाने गणितात बाजी मारली. मात्र, एकूण गुण मात्र दोघांचेही सारखेच राहिले. अभ्यासात एकमेकांना मदत करत त्यांनी हे यश मिळवले.

दहावीच्या निकालात पुन्हा मुलींची सरशी   ( SSC Result 2026)

यंदाच्या दहावीच्या परीक्षेत मुलींनी पुन्हा एकदा मुलांपेक्षा सरस कामगिरी केली आहे. मुलींचा निकाल ९४.९६ टक्के लागला असून मुलांचा निकाल ९०.५६ टक्के इतका नोंदवला गेला आहे. (SSC Result 2026)